Бүгінгі сұхбат айдарында қалалық мәслихаттың жас депутаттарының бірі Сұлтанхан Тәштеевпен тілдестік. Қаламыздың облыс орталығы атанғанына биыл бір жыл толып отыр. Осы уақыт аралығында орын алған өзгерістер жайлы ой бөліссеңіз.
– 1500 жылдық тарихы бар көне шаһарымыздың облыс дәрежесіне ие болғанына бір жыл толып отыр. Бұл айтулы датаны жұртпен бірге кеңінен тойладық. Баяғыда аталарымыз «Түркістанның ұлтарақтай жері алтынмен теңеседі» деп айтатын. Біз оны ертегіге балап, балалықпен аса мән бермейтінбіз. Көріпкел көнелеріміз айтқан күн туды деп ойлаймын. Облыс атағын алған бір жылдың ішінде-ақ қалада құрылыс қарқынды жүруде. Құрылыс алаңына айналған Түркістанда айнадай асфальт жолдар мен қарасаң көз тоймайтын зәулім ғимараттар салынып, «Цифрлы Қазақстан» бағдарламасы аясында қаламыз ақылды қалаға айналуда. Қоғамдық көліктер жаңа заман талабына сай автобустармен толығып, бұл өзгеріс тұрғындардың көңілінен шығуда. Бұның барлығы ел игілігі үшін жасалған тың бастамалар. Елбасы – Тұңғыш Президентіміздің мұндай маңызды шешім қабылдауын даналық деп білемін.
– Облыс әкімі Ө.Шөкеевтің өкімімен қаламызға жаңа басшы тағайындалды. Қала әкімі Р.Аюпов бастаған рухани шаһардың болашағынан не күтесіз?
– Түркістандықтар үшін шілде айының басы жаңа өзгеріспен басталды. Олай дейтінім, қаламызға жас іскер азамат Р.Аюпов әкім болып тағайындалды. «Жас келсе – іске» деген сөз бар халқымызда. Бойында жігері бар «Болашақпен» шетелде білімін толықтырған жаңа басшы тың бастамаларға серпін болады деген ойдамыз. Іске кірісе салып мемлекеттің басты байлығы – халқы екендігін ескерген оның қала тұрғындарымен кездесіп, олардың мұң-мұқтажын тыңдап, түйіткілді мәселелерді түртіп алып жатқандығын көз көрді. Рухани шаһарды туристік ордаға айналдырамыз деп қаланың тазалығын алдыңғы орынға қойғаны бізді қуантты. Биыл «Жастар жылы». Осыған орай Түркістанның тұрғындарынан бөлек жастарымен кездесіп, пікір алмасу арқылы халыққа етене жықындығын көрсетті. Жаңа басшымен облыс орталығының болашағынан күтеріміз көп. Қаламыздың әлеуеті артып, халқымыздың мәдениеті жоғарылап, туристер ағыла келетін Еуразия материгіндегі көне шаһарлардың бірі болады деген ойдамын.
– Балалық шағыңыз қайда өтті? Мектепте қандай оқушы, жоғары оқу орнында қандай студент болдыңыз?
– Өзім Түркістанның тумасымын. Балғын балалық шағымның бәрі қазіргі облыс орталығында өтті. Кейде күйбең тіршіліктен шаршаған шақта ақын Мұқағали Мақатаевтың «Сәби болғым келеді» деген өлеңі ойға еріксіз оралады. Балалық шаққа деген сағыныш қашан да жүрек түкпірінде тұрады ғой. Ғани Мұратбаев атындағы №5 жалпы орта мектепті үздіктердің сапында аяқтап, Қазіргі таңда алған білімімді өмірлік тәжірибемде қолданып келемін.
– Сіз үшін депутат қандай болуы керек?
– Депутат – халықтың қалаулысы. Сондықтан, оның ең басты міндеті халыққа қызмет жасау болып табылады. Өз жұмысына жауапкершілікпен қарап, елдің, өз сайлаушыларының мүддесі үшін жұмыстар атқаруы шарт.
– Халықтың қалаулысысыз, депутаттар арасында халық мүддесі үшін қандай өзекті мәселелер көтердіңіз? Сайлаушыларыңыздың сізге артқан сенімін қаншалықты ақтай алдым деп ойлайсыз? Сонымен қатар, алдағы уақыттағы жұмыс жоспарыңызбен бөліссеңіз?
– Депутаттыққа сайланбастан бұрын кірістер басқармасында 10 жылға жуық еңбек еттім. Жас маманнан бөлім басшысына дейін көтерілдім. Халықтың қалаулысы атанғаннан кейін сайлауалды бағдарламамның барысында Құсшы ата ауылындағы 30-ға жуық үйге ауыз су кіргізіп, Оранғай ауылына көпір салдырдым.Еліміз зайырлы мемлекет болғанымен, халқымыздың 75 пайызы мұсылман қауымы екендігін жақсы білесіздер. Қосқорған елді мекенінде «Әбдукарим ата» мешітін салдырттым. Өзім жастайымнан спортқа бейім болдым. «Спорт – денсаулық кепілі» деп текке айтылмаса керек. Салауатты өмір салтын қалыптастыру мақсатында 5-рет жасөспірімдер арасында қазақша күрестен республикалық турнир өткіздім. Мұның барлығы да елімнің артқан сенімінен шығып, аз болса да халқыма өз пайдамды тигізу. Алдағы уақытта ұлттық ойынымыз көкпар мен әлемдегі бірінші спорт – футболдан жарыстар өткізу ойда бар.
– Әлеуметтік желілерге жиі кіресіз бе, сол арқылы өз сайлаушыларыңызбен кері байланыс жасайсыз ба? Бұқаралық ақпарат құралдарын қаншалықты жиі қарап, оқып, тыңдайсыз?
– Осы күні өмірімізді смартфонсыз елестете алмаймыз. Себебі, бесіктегі баладан, еңкейген қартқа дейін ұялы телефонды ұстауды үйрендік. Әлеуметтік желіге жиі кіремін. Онда халықпен тығыз байланыс жасауға болады. Желіде отырған жан өз ойын қымсынбай емін-еркін жеткізе алады. 21 ғасыр ақпарат дәуірі емес пе? Соңғы жаңалықтарды телеарналардан, радио мен газеттерден оқып, қарап, тыңдап тұрамын. Оның ішінде сіздердің газеттеріңіздің тұрақты оқырманымын. Қаламыздың тыныс-тіршілігі мен маңызды ақпараттарын жеткізетін 90 жылға жуық тарихы бар баспасөздеріңіз жаңалықтың жаршысы болып жүре берсін. Мені бір қуантқаны, сіздердің газетпен ғана шектелмей сайтын ашып, әлеуметтік желілерде парақшалармен белсенді жұмыс жасауларыңыз жұртқа ақпараттарды жедел әрі сапалы жеткізетіндеріңізге рахмет.
– Жанұяңызда қандай жансыз, балаларыңыз үшін қандай әкесіз, отбасыңызға қаншалықты көңіл бөлесіз? «Шапаның қанша алтын болса да жаға менен жең керек, қанша батыр болсаң да ағайын-туыс ел керек» дейді, ағайындарыңызбен қаншалықты араласып немесе көмектесіп тұрасыз?
– Көпбалалы жанұяда дүниеге келгенмін. Бір отбасында 7 қыз 2 бала өстік. Оның өзі көпшілікпен жұмыс жасауыма көп көмегін тигізді. Әкемнің айтқан өсиеттерін бойға сіңірдік. Ол кісі «Бір қора малың болғанша, бір балаң ғалым болсын» деген қағиданы ұстанған жан еді. Анам Кенжекүл екеуі шамасы келгенінше біздің оқып-тоқуымызға күш салды. Соның арқасында елге қызмет жасаудамыз. «Әкеңнің ұлы болма, елдің ұлы бол» деген сірә осы шығар. Бауырларыма қолымнан кегенінше көмек беріп тұрамын. Жұбайым Бақыткүл екеуміз қазіргі таңда бес баланың ата-анасымыз. Құдайдың берген 4 қыз, 1 ұлым бар. Алды мектепте 9 сыныпты бітірді. Мүмкіндігінше жанұяға, отбасы тәрбиесіне көп көңіл бөлемін.
Сұхбатыңызға рахмет!
Орынбек ҚАСЫМБЕКОВ,
«Түркістан».