Кемелденуге қадам басқан әрбір жан кітаппен дос болары анық. Әлеуметтік желінің дамыған кезеңінде газетті сайтқа, кітапты электронды түрге алмастырдық. Ал кейбіріміз тіпті бір мезгіл парақтап шығуға да уақыт таппай жатамыз. Сондай олқылықтардың орнын толтыруға атсалысып жүрген елімізде бір топ азаматтар бар. Олар әр өңірде және әр сала өкілдері болғанымен, «Кітаптар әлемі» жобасы аясында орта қалыптастырып үлгерген еді. Жоба авторы Салтанат Әбдіғали үлкен істі қолға алып, алғашқы қадамын жасаған болатын.
Міне биыл бұл бастамаға да 4 жыл толып отыр. Жоба негізінде кітап жанашырлары былтыр Алатау бөктерінде алғаш рет бас қосты. Ал бұл жолы көпшіліктің шешімімен киелі Түркістан өңірінің сырлы Созақ ауданына таңдау түскен. Апта соңында Жұмбақтаудың жұмбағын шешуге талпынған жұрт күйбең тіршіліктен бір сәт арылып, кітаптар әлеміне саяхат жасап қайтты. Арысы Жезқазған мен берісі Алматыдан, көршілес Жамбыл облысы мен Түркістан өңірінің аудан, қалаларынан келді.
Шығармалардан үзінділер оқылып, тапқан оқырманға кітап сыйланды. Жарыса өлең оқылып, қосыла ән шырқалды. Ал енді бірі арнау арнап, кеш көркін қыздыра түсті. Осылайша өз өнерлерін паш етті. Тарихтан шежіре айтылып, қаламгер еңбегі насихатталды.Өзара пікір алмасып, жаңа буын қалыптастырып жатқан қазіргі заман әдебиеті талданды.
Жоба жетекшісі өз сөзінде бұл міндеттің жауапкершілігі оңайға соқпайтынын тілге тиек етіп, қатысушыларға алғысын жеткізді. «2020 жылы қараша айында алғаш эфирге шықтық. «Кітаптар әлемі» жобасы жұмыс істей бастады. 2021 жылы 21-ші наурызда «Кітап жанашырлары» тобы ашылды. Қазір қызығушылық танытушылар көп, әсіресе жас буынның руханиятқа қадам басқаны қуантады. Осыны ескеріп, аптаның әрбір күнін жоспарлап, кітап талдап, жұмбақ жасырамыз. Осы орайда осында отырған әрбіріңіздің еңбегіңіз орасан» деді ол.
Мақсаты айқындалып, оқырманы мен қолдаушылары артып жатқан жобаның негізгі идеясы әлеуметті күнделікті кітап оқуға дағдыландыру, сонымен қатар ойды қорытып, дұрыс талдай білуге баулу, әсіресе жас буынға кітап әлемінде бағыт-бағдар беру. Бұл жобада маған ұнайтын ең қызық тұсы – әдебиет шығармаларының жеңіл, қарапайым, сауатты талдануы.
Ал түркістандық ұстаз Ләззат Өтешова «Кітап – үнсіз ұстаз! Басқосуда кітапқұмар оқырман достармен өлең оқып, ән салдық, кітап оқытудың жаңа форматтарын ұсындық. Проза мен поэзия үзінділерін жасырып, тапқан жеңімпаздарды кітаппен марапаттадық. Келген қонақтар шығармашылықтарын ортаға салып, кітаптарын сыйға тарттты. Созақтық азаматтардың қонақжайлылығына тәнті болып, марқайып қайттық. Қазақ осы дейтіндей-ақ қой!
«…Төскейіңде құлынданып,
Қыратыңда тұлымданып,
Рухани ұғым дарып,
Самғап қайттым Созағым», –
деп жырлаған Сайлаухан ақындай, рухани ұғым дарып, самғап қайттым!» дей келе жоба авторына әдебиеттің әдемі әлемін насихаттап, қазақтың сөз өнерін танытып жүрген еңбегіне алғысын білдірді.
Көңілді мұң, жүректі кір, сананы тұман баспас үшін кітап оқу аса қажет. Үнемі ізденіспен, асқан жауапкершілікпен көркем әдебиетті жаңа форматта насихаттап, жаңа мәдени әрі рухани орта қалыптастырып жүрген қазақ қызының еңбегін де атап өтпеске болмас. Осы жоба аясында түрлі байқауды тұрақты түрде өткізіп, демеушілер арқылы да оқырманды ынталандырып келеді. Бұдан бөлек жобаның барлық эфирі мен түрлі танымдық видеолар салынатын ютуб арнасы да жұмыс істейді. Жобаның өміршең болуын тілеп, рухани байып қайтты. Кітап оқитын жастар көбейіп, қазақ әдебиеті әлемге таныла түссін дейміз.
Тұрсынай ШАМЕТОВА.