Қаламыздағы «Ақжайық» музыка мектебінде білім саласы қызметкерлерінің жыл сайынғы дәстүрлі тамыз кеңесі болып өтті. Облыстық адами әлеуетті дамыту басқармасының басшысы Рахымбек Қуатбекұлы қатысқан кеңесте педагогтардың атқарған істерін таразылап, алдағы міндеттерін айқындады. «Білімді ұлт – тұрақты дамудың кепілі» тақырыбындағы кеңеске білім беру ұйымдарының басшылары, оқу және тәрбие ісі жөніндегі орынбасарлары, педагогтар қатысты.
Жиынды ашқан облыстық адами әлеуетті дамыту басқарма басшысы Р.Қуатбекұлы ұстаздар қауымын алдағы білім күнімен құттықтады.
– Ұлы қызметті ұлықтап, қиын да қастерлі салаға еніп, ұрпаққа сапалы білім мен саналы тәлім-тәрбие беруді мұратқа айналдырған ұлағатты еңбек иелері ұстаздар қауымы қашанда құрметке лайық. Талантты, дарынды шәкірттеріміздің қабілеттерін шыңдап, оларды қолдауға мемлекет тарапынан барлық мүмкіндіктер жасалған бүгінгі қоғамда елдің атын шығарып, аймақ абыройын асыратын, өңірді өркендетіп, туған жерді түлететін білімді шәкірттеріңіз көп болғай деп, ең бастысы жас ұрпаққа сапалы білім берудің маңыздылығын баса айтып, білім саласын дамытуға қосқан үлестері үшін барша ұстаздар қауымына алғысымды білдіремін, – деді.
Педагогтардың дәстүрлі тамыз конференциясында сөз алған Түркістан қаласы адами әлеуетті дамыту бөлімі басшысының міндетін атқарушы Гүлмира Құлбайымбетова өткен оқу жылында атқарылған істерге есеп беріп, болашаққа бағдар жасады. Ол өз сөзінде жалпы білім беру мекемелерін қаржыландыруға биыл 16 млрд. 91млн. теңге бөлінгенін және биылғы жылдың ең басты жаңалықтарының бірі – 2021 жылдың 1-қаңтарынан бастап білім беру саласының басқару жүйесі өзгергенін алға тартты. Сондай-ақ биылғы оқу жылындағы басты әрі қуанышты жаңалықтың бірі – білім күні мектеп табалдырығын алғаш аттаған бүлдіршіндеріміз «Әліппені» қайта қолға алатын болды.
Еліміздегі эпидемиологиялық ахуалға байланысты барлық оқу орындарында санитарлық нормалардың сақталуы ерекше назарға алынып, қажетті деген дезинфекциялық құрал-жабдықтармен қамтамасыз ету басты назарда екені баяндалды. Бұдан өзге қала бойынша 4790 мектеп қызметкерлері болса, оның ішінде 4289-ы ұстаздар. Сонымен қатар мұғалімдердің біліктілігіне қосымша берілетін санаттар шебер, зерттеуші, сарапшы және модератор санаты болып бөлінеді. Әр мұғалімнің шебер санаты үшін 50, зерттеуші санаты үшін 40. Сарапшы санаты үшін 35, модератор санаты үшін 30 пайыз үстеме ақы төленетін болады. Сондай-ақ үш тілде сабақ бере алатындар саны 141-ді құраса, магистр дәрежесі бар 46 педагогтар бар. Үш тілділікпен сабақ бергені үшін БЛЖ-ның 2 еселегені, магистр дәрежесі үшін 10 АЕК үстеме ақы төленетіні баса айтылды. Түркістан қаласында инклюзивті білім беру жобасы бүгінде айтарлықтай өз жемісін берген. Мысалы, инклюзивті білім беру үшін жағдай жасалған мектептердің үлесі 57,1% -ға жетіп, 20 мектепте 28 балаға 24 түзету дамыту сыныптары ашылған. Арнайы білім беру ұйымдарында инклюзивті біліммен қамтылған балалардың үлесі 24,7 пайызды құраса, мектептердің үлесі 57,1 пайызды құрайды.
Тамыз кеңесінде ұстаздар сөз алып, мемлекет тарапынан білім саласына көрсетіліп жатқан қолдауларға ризашылықтарын білдіріп, жас ұстаздарға жаңа идеялы көзқараспен сапалы білім беру бағытына тілектестіктерін жеткізді. Жиын соңында білім саласының дамуына үлес қосып, ерекше шығармашылығымен жоғары жетістіктерге жеткен ұстаздарға ҚР Білім және ғылым министрлігінің Құрмет грамотасымен, облыс әкімінің және облыстық мәслихаттың, облыстық адами әлеуетті дамыту басқармасының марапат қағаздары табысталды.
Балдәурен ЖҰМАБЕКОВА