Туркистон шаҳридаги Б.Шўлақ ёпиқ ўйингоҳида шаҳар, вилоят маслаҳатларининг собиқ депутати, “Иасси” консорциуми раҳбари, қўл тенниси бўйича шаҳар федерацияси президенти Умбет Абилдаули Жусипбаев билан учрашиб, мулоқотда бўлдим.
– Ушбу спорт тури билан ёшлигимдан шуғулланаман. Ҳаракат, чаққонликни талаб қиладиган бу ўйин саломатликни мустаҳкамлайди. Бошқаларни қўл тенниси билан шуғулланишга даъват этаман, – деди у.
Навбатдаги суҳбатдошим – 12 ёшдаги Рамазан Назир бўлди. Бобоси Қанибек Қарашев билан Асиқатадан келган экан.
– Теннис бўйича спорт усталигига номзодман. Олти йилдан буён спортнинг ушбу тури билан шуғулланаман. Қозоғистон чемпионатида биринчиликни эгалладим. Энди жаҳон чемпиони бўлиш ниятидаман, – деди у.
Фахрий устоз, таниқли дин пешвоси Пўлат Ҳайдаров ҳам одатдагидек спорт анжуманига ташриф буюрган экан.
– Одам ҳар куни уч маҳал тамадди қилиш одат тусига киргани каби, спорт ҳам унинг ҳаётида мустаҳкам, доимий ўрин эгалласа, бундан у фақат ютади. Саломатлиги, кайфияти чоғ бўлиб, дори-дармон сотиб олмайди. Соғлом яшаб, узоқ умр кўрай десангиз – спорт билан шуғулланинг, – деди Пўлат ака.
Мана шу спорт анжуманини уюштириб, ўнлаб йиллар давомида юзлаб, эҳтимол минглаб туркистонликларни спортнинг ушбу турига ошно қилган Умбет Абилдаулига миннатдорчилик изҳор этамиз.
Ш. МАДАЛИЕВ.