Қаламыздағы Бекзат Саттарханов атындағы спорт-сауықтыру кешенінде Түркістан қаласының «Құрметті азаматы», қазақ күресінен спорт шебері Ерқанат Рахымұлы Тәңірбергеновті еске алуға арналған қазақ күресінен 1998-2000 жылы туылған жастар арасындағы «Тайқазан» республикалық турнирі мәреге жетті. Желтоқсанның 12-14 жұлдызы аралығында өткен дүбірлі додаға еліміздің барлық аймақтарынан 6 салмақ дәрежесі бойынша 200-ге тарта спортшылар қатысып, боз кілемде бақтарын сынады.
Ерқанат Тәңірбергенов Түркістан қаласында 1982 жылы туылған, қазақша күрес, самбо және дзюдодан Қазақстан Республикасы біріншілігінің бір неше дүркін жеңімпазы және жүлдегері, 2002-2003 жылдары самбо күресінен әлем біріншілігінің қола жүлдегері, киелі өңір спортының дамуына сүбелі үлесін қосқан спорт жанашыры. Ол 2012 жылдан бастап өмірінің соңына дейін Түркістан қаласындағы Ә.Нұрмаханов атындағы олимпиада резервінің мамандандырылған балалар мен жасөспірімдер спорт мектебінің директоры қызметін абыроймен атқарған. Дидар Хамза, Нұрлан Мырзабаев, Бек Нұрмағанбет, Бибарыс Әбдіғани сынды бір неше талантты спортшылар бүгінде әлемдік додаларда ел намысын абыроймен қорғап, киелі қаламыздың атын асқақтатып жүрген осы мектептің төл шәкірттері.
Осылайша, ел игілігі жолында еселі еңбек атқарған Ерқанат Тәңірбергеновты еске алуға арналған республикалық турнирдің ашылу рәсімінде сөз алған Түркістан облысы әкімінің орынбасары М.Отарбаев, Түркістан облыстық мәслихатының хатшысы Қ.Балабиев, ХҚТУ-нің президенті Б.Абдрасилов, Шымкент қаласының дене шынықтыру және спорт басқармасының басшысы Ә.Нұртаев, қазақ күресінен Әлем және Азия чемпионы, «Қазақ барысы» турнирінің үш дүркін жеңімпазы Б.Ыстыбаевтар балуандарға ізгі ниеттерін білдіріп, марқұм Ерқанат Тәңірбергенов жайлы естеліктерімен бөлісті.
Жоғары деңгейде ұйымдастырылған жарыс қыза түсті. Әсіресе, «Күш атасын танымайды» деген халық нақылы да осы бәсекеде айқындала түскендей. Белдесулерде Түркістан облысы атынан шыққан түркістандық балуандарда да аянып қалмады. Әсіресе, түйе балуан белдесуі тартысқа толы өтті. Өз жанкүйерлерінің қолдауына ие болған балуанымыз Бибарыс Әбдіғани алматылық қарсыласы Ғазиз Оңғарбайды жеңіп, жауырыны жер иіскемей Түйе балуан атанды. Сондай-ақ, Тоқтарбек Айдарбек (82 келі), Кемелбек Молдаш (66 келі) жеңіс тұғырының жоғары сатысынан көрінсе, Бағлан Жүсіпәлі (60 келі) қола жүлдеге ие болды.
Жарыстың соңғы күні жалпыкомандалық жарыс өтті. Жарыс қорытындысы бойынша тас түйін дайындықпен келген алматылықтар бірінші орынды иеленсе, Түркістан облысы мен Шымкент қаласы ІІ, ІІІ орындарды өзара бөлісті. Осылайша облыс орталығында тағы бір үлкен спорт жарыс мәреге жетті, жеңімпаз бен жүлдегер атанған барлық балуандар қомақты қаржы және сый-сияпаттармен марапатталды.
Райымжан ӘЛІБАЕВ,
«Түркістан».
