ӨМІРБАЯНЫ
Калмурзаев Болат Есиркепович 1989 жылы 21 маусымда Түркістан облысы, Түркістан қаласында дүниеге келген. 2004 жылы жалпы білім беру мекемесін бітірген. Одан әрі, Түркістан қаласындағы Тұран колледжінің «Экономика» мамандығына оқуға түсіп, 2006 жылы аталған оқу орнының түлегі атанған.
2006 жылы Мұхтар Әуезов атындағы Оңтүстік Қазақстан Мемлекеттік Университетінің «Экономика» факультетіне оқуға түсіп, 2008 жылы тәмамдаған.
Жалпы меңгерген тілдері – Қазақ тілі, орыс тілі, ағылшын тілі.
Еңбек жолында 2008 жылы Атырау қаласында сауда және құрылыс саласында кәсіпкерлікке бет бұрған.
Сонымен қатар, 2021-2024 жылдар аралығында Түркістан қаласында құрылыс саласында кәсіпкерлік жолын бастады. Құрылыс саласында:
– 195 орындық жекеменшік жаңа, заманауи «LU-LU» бала-бақша іске қосылды.
– 550 орындық «BASTAU» орта білім беру мектебі іске қосылды.
– 595 орындық «Бекзат Саттарханов атындағы Футбол академиясы» спорт мектеп-интернаты іске қосылды.
2023 Атырау қаласында «Туман» ресторан бизнесін бастады. Атырау облысының «X-TER» спорттық тауарлар брендінің амбассадоры атанды.
2024-2025 жылдар аралығында «ER-QAN GROUP» ЖШС құрып, Түркістан қаласы «TURAN арнайы экономикалық аймағында» 100 жұмыс орны бар полиэтилен пакеттер мен пластикалық ыдыстар зауытының құрылысын аяқтап, зауыт жұмысын бастады.
Калмурзаев Болат Есиркеповичтің Қазақстанның оңтүстігіндегі құрылыс жобаларын сәтті жүзеге асыруға қосқан үлесі жоғары бағаланып, алғыс хаттармен марапатталды. Қазіргі таңда елімізге өзге мемлекеттерден жаңа инновациялық өндіріс орнын ашу барысында, инвестициялық қаржыландыру жолымен жүргізілетін жоба бойынша қызмет етіп келеді.
САЙЛАУАЛДЫ БАҒДАРЛАМАСЫ
Құрметті жерлестер! Қадірлі Түркістан қаласының тұрғындары!
Түркістан – тарихы терең, рухани мұрасы бай, болашағына үлкен үміт артылған қасиетті шаһар. Бүгінде қаламыз жаңа даму кезеңін бастан өткеріп, еліміздің маңызды мәдени, рухани және әлеуметтік-экономикалық орталықтарының біріне айналып келеді. Қаланың сәулеті жаңарып, жаңа тұрғын аудандар бой көтеріп, халықтың тұрмыс сапасын жақсартуға бағытталған ауқымды жұмыстар жүзеге асырылуда.
Дегенмен, қаланың қарқынды дамуы тұрғындардың күнделікті өмірінде кездесетін барлық мәселе толық шешілді дегенді білдірмейді. Қоғамдық көліктің қолжетімділігі, ішкі көшелердің жағдайы, коммуналдық қызметтердің сапасы, әлеуметтік қолдау, білім беру, спорт инфрақұрылымы және тұрақты жұмыспен қамту мәселелері әлі де жүйелі назар аударуды қажет етеді.
Мен үшін қаланың дамуы ең алдымен оның тұрғындарының әл-ауқатымен өлшенеді. Әрбір отбасының тұрмысы жақсарып, әрбір баланың сапалы білім алуына жағдай жасалып, әрбір жас өз қабілетін жүзеге асыруға мүмкіндік алғанда ғана қоғамның шынайы өркендеуі туралы айтуға болады.
Заңгерлік білімім, кәсіпкерлік қабілетім маған қоғам өміріндегі заңдылықтың, әділдіктің, азаматтық жауапкершіліктің және адам құқықтарын құрметтеудің маңызын түсінуге негіз болды. Кез келген қоғамдық мәселені шешуде заң талаптарын сақтау, тұрғындардың заңды мүдделерін қорғау және мемлекеттік органдардың халық алдындағы жауапкершілігін арттыру маңызды деп есептеймін. Осы ұстанымдарды басшылыққа ала отырып, Түркістан қаласының әлеуметтік-экономикалық дамуына үлес қосуды, тұрғындардың өзекті мәселелерін көтеруді және олардың шешілуіне депутаттық өкілеттік шеңберінде ықпал етуді мақсат етемін.
Менің сайлауалды бағдарламам бес негізгі бағытқа негізделген.
1. ҚАЛА ИНФРАҚҰРЫЛЫМЫН ЖАҚСАРТУ
Қала көшелерін, ішкі жолдарды, тротуарлар мен жаяу жүргіншілер өткелдерін жөндеу мәселесін көтеру. Көше жарығын, қоғамдық көлік сапасын, аялдамаларды жақсартуға, ауызсу, кәріз және электр жүйелерін дамытуға ықпал ету.
2. ӘЛЕУМЕТТІК ӘДІЛДІК ЖӘНЕ ХАЛЫҚТЫ ҚОЛДАУ
Аз қамтылған және көпбалалы отбасылардың, қарттардың, мүгедектігі бар азаматтардың мәселелерін назарда ұстау. Кедергісіз орта қалыптастыруға, әлеуметтік қызметтер мен оңалту құралдарының қолжетімділігін арттыруға ықпал ету.
3. СПОРТТЫ ДАМЫТУ
Бұқаралық спорт пен балалар спортын қолдау, аула спорт алаңдарын көбейту, спорт нысандарының материалдық-техникалық базасын жақсарту. Параспортты, ұлттық спорт түрлерін дамытуға, спортшылар мен жаттықтырушыларды қолдауға басымдық беру.
4. БІЛІМ БЕРУ ЖӘНЕ ЖАСТАР САЯСАТЫ
Білім беру ұйымдарының жағдайын жақсарту, мектептердегі орын тапшылығы мәселесін көтеру. Жастардың сапалы білім алуына, жұмысқа орналасуына, кәсіптік дамуына және шығармашылық бастамаларына қолдау көрсету.
5. ЖҰМЫСПЕН ҚАМТУ ЖӘНЕ КӘСІПКЕРЛІКТІ ҚОЛДАУ
Жаңа жұмыс орындарын ашуға, шағын және орта бизнесті дамытуға ықпал ету. Жастар мен әлеуметтік осал топтарды жұмыспен қамту, кәсіптік оқыту және кәсіпкерлік бастамаларды қолдау.
Құрметті Түркістан қаласының тұрғындары!
Әрбір қаланың өзіндік тарихы, қалыптасқан дәстүрі және болашаққа бағытталған мұраты болады. Ал сол мұраттың жүзеге асуы ең алдымен тұрғындардың бірлігіне, ортақ жауапкершілігіне және қоғамдық мәселелерге бейжай қарамауына байланысты.
Түркістан – халқымыздың рухани тұғыры, тарихымыздың алтын бесігі, бүгінгі жаңару мен жасампаздықтың маңызды орталығы. Қасиетті шаһардың келешегі баршамыз үшін қымбат. Оның дамуына үлес қосу – тек мемлекеттік органдардың ғана емес, туған елінің болашағына жауапкершілікпен қарайтын әрбір азаматтың ортақ міндеті.
Мен заңгерлік білім алған азамат ретінде қоғамдағы кез келген өзгерістің негізінде заңдылық, әділдік және жауапкершілік қағидаттары тұруы тиіс деп есептеймін.
Заң үстемдігі сақталған, азаматтардың құқықтары құрметтелген, қоғамдық мәселелер ашық талқыланған ортада ғана халықтың мемлекеттік институттарға деген сенімі нығаяды.
Бүгінгі Түркістанның алдында тұрған міндеттер ауқымды. Қаланың инфрақұрылымын дамыту, тұрғындардың әлеуметтік жағдайын жақсарту, спорт пен білім беру салаларын қолдау, жастарға мүмкіндік жасау және тұрақты жұмыспен қамтуды қамтамасыз ету – жүйелі еңбекті қажет ететін бағыттар.
Мен осы мәселелерді шешуге өз білімім мен азаматтық ұстанымым арқылы үлес қосуды мақсат етемін. Депутаттық қызметті халықтың сенімін арқалайтын үлкен жауапкершілік деп түсінемін. Сондықтан, тұрғындардың өтініштерін тыңдау, олардың заңды мүдделерін қорғау, өзекті мәселелерді құзыретті органдардың қарауына жеткізу және шешілу барысын қадағалау – мен ұстанатын негізгі қағидалар.