Түркістан облысында жерден несібе терген шаруалар үшін қуанышты жаңалық. Атап айтсақ, шаруа қожалықтарының шығындарын төрт есе азайтып, өнімдерінің бәсекеге қабілеттілігін арттыруға мүмкіндік беретін егіс алқаптарындағы су тапшылығы таяу арада шешімін таппақ.
Тарқатып өтсек, өңірде 250 мың гектар суармалы жер пайдалануға беріледі. Бұл Түркістан облыстық Кәсіпкерлер палатасы ұйымдастырған ҚР Ауыл шаруашылығы министрлігі Су ресурстары комитетінің төрағасы Ислам Әбішовпен кездескен аймақ кәсіпкерлерінің қол жеткізген басты жетістігі болды.
Егіс алқаптарында ағын судың жетіспеушілігі – бұл Ұлттық Кәсіпкерлер палатасы басқармасының төрағасы Абылай Мырзахметовтың Түркістан облысына жасаған сапары аясында Өңірлік палата басшылығы тарапынан көтеріліп, қолдау тапқан мәселенің бірі болды.
Облыстағы ауыл шаруашылығының дамуына кедергі келтіретін ең маңызды мәселелердің бірі – «Арыс-Түркістан» каналындағы су жетіспеушілігі. Мәселен, Кентау қаласына қарасты Жібек Жолы ауылдық округінде ағын су тапшылығынан жердің көп бөлігі игерілмей қалған. Бұл аумақта суармалы жер көлемі 2060 гектарды құрайды. Арналардағы судың жетіспеуіне байланысты шаруалар егінді суару үшін моторлы ұңғымаларды (құдықтар) пайдаланады. Ауылда 123 моторлы ұңғымалар бар. Бір гектар жерді суару үшін фермерлер 120 мың теңге жұмсайды. Жалпы егістік жерлерді суаруға кеткен қаражатты кәсіпкерлер қалтасынан төлейді. Бұл өнімнің бәсекеге қабілеттілігін төмендетеді. Осындай жағдай Майдантал ауылының кәсіпкерлерінде де кездесті. Су жетіспегендіктен, 1815 гектар егістік алқабының тек 800 гектар бөлігі ғана игерілген. Мұндағы жергілікті су қоймасының сыйымдылығы 8 миллион текше метрді құрағанымен, оның таязданып, ластануына байланысты судың 6 миллион текше метрі ғана шаруаларға жетіп отыр.
Кездесу нәтижесі бойынша Палата сарапшылары көтерген мәселелердің барлығы дерлік министрлік тарапынан қолдау тапты. Жаңа жобалар бойынша 2021 жылға қарай Түркістан облысында 250 мың гектар суармалы жер пайдалануға берілмек. «Арыс-Түркістан» каналынан су пайдаланатын шаруа қожалықтарының шығындары біріктіріліп, нәтижесінде шаруалардың су тұтыну шығыны екі есе азаяды. Бұдан басқа, Жібек Жолы ауылындағы 123 моторлы ұңғыма мен Майдантал су қоймасы «Қазсушар» су ресурстары комитетінің меншігіне өтетін болды. Бұл шаруа қожалықтарының шығындарын 4 есеге азайтып, өнімнің бәсекеге қабілеттілігін арттырады. «Шаруалардың өзекті мәселелеріне қатысты ұсыныстарымыз министрліктің қолдауына ие болды. Бұл өңірдегі аграрлық сектордың дамуына елеулі үлес қосады», – деп атап өтті Түркістан облысы Кәсіпкерлер палатасы директорының орынбасары А.Исмаил.