Түркiстан медицина колледжiнде кiтапхана ұжымының ұйымдастыруымен халқымыздың ұлы ақыны – Абай Құнанбайұлының шығармашылығына арналған «Қара сөздер – Абай өмiрiнiң рухани қорытындысы» атты тағылымды кеш өткiзiлдi. Кештiң мақсаты – философиялық тұжырымдарға толы Абай Құнанбайұлының қара сөздерiнiң мазмұнын, тәрбиелiк мәнiн ұғындыру, адамгершiлiк тәрбие берудегi ақынның ойларының тереңiне үңiлуге үйрету.
Абайды таныту арқылы бiз Қазақстанды әлемге танытамыз, қазақ халқын танытамыз. Абай бiздiң ұлттық ұранымыз болуға тиiс. Оның мұралары – қазақтың ең қасиеттi алтын қазынасы. Уақыт өткен сайын халқымыз ғұлама Абайдың жандүниесiне терең бойлап, оның ұлылығының тың қырларын ашып, жаңа сырларына қаныға түсуде. Абай өзiнiң туған халқымен мәңгi-бақи бiрге жасап, жаңа биiктерге, асқар асуларға шақыра бередi. Шарада колледжiмiздiң белсендi студенттерi Абай атамыздың қара сөздерiн жатқа айтты.
Кештi қорытындылаған колледж оқытушылары Г.Алдабергенова, Р.Қасымова, Қ.Бектұрғановтар ұлтымыздың рухани ұстазы болған тұлғаның қара сөздерiнiң ұрпаққа тағлымы мол екендiгiн, даналық сөздерi адамгершiлiкке, мейiрiмдiлiкке, имандылыққа, бiлiмдi болуға жетелейтiндiгiн айтып, өз пiкiрлерiн бiлдiрдi.
Әлима МҰСТАПАЕВА,
Түркiстан медицина колледжiнiң кiтапхана меңгерушiсi.