Бүгiнгi күнде жылыжай салып, кәсiбiн дөңгелетiп, табыс тауып отырған отбасылар көптеп саналады. Оның нақты дәлелi ретiнде бiздер болған Ескi Иқан ауылында үйiргелiк жерiне жылыжай салып, табыс тауып, отбасын асырап отырған жанұяда болып, жылыжайдың жұмысымен таныстық. Ескi Иқан ауылдық округi әкiмi аппаратының бас маманы Тұрғын Ахметов бiздi диханшы Зухриддин Мухаммедовтың үйiне алып барды. Өзiнiң үйiргелiк ауласындағы 12 сотық жылыжайында қияр, қызанақ, болгар бұрышын өсiрумен айналасып келедi.
Кейiпкерiмiз Зухриддин Мухаммедов ауылдағы Ясауи атындағы жалпы орта мектебiнде математика пәнiнен дәрiс бередi. Сонымен қатар, диханшылық кәсiппен бала кезiнен айналысып келедi. Үйiргелiк жерiне үш жыл көлемiнде отбасымен бiрге жылыжай жұмысын қолға алыпты. Отбасылық кәсiп болған соң шаруашылықпен ұлы Хусан Мухаммедов екеуi айналысады екен. Жылыжай соңғы технология бойынша жабдықталған. Егiлген егiс тамшылатып суару арқылы жүргiзiледi. Су тек өсiмдiктiң тамырына ғана жiберiледi. Бұл технология өз кезегiнде суды үнемдеуге септiгiн тигiзедi. Қыс бойы жылыжай температурасын бiрқалыпты ұстап, өнiмдi тоңдырып алмау үлкен еңбектi қажет етедi. Жылыжай iшiндегi жылылық бiрқалыпты сақталған жағдайда мол өнiм алуға болады. Осы ретте, бiздер, жылыжай шаруашылығын одан әрi дамытуда алдағы жоспарларымен бөлiсудi сұрадық.
– Жылдағыдай жылыжайда көкөнiс егу жұмысы ақпан айында басталса, небәрi наурыз айының ортасына қарай өнiм бере бастайды. Жылдағы тiршiлiкпен жаздың шiлдесiне дейiн жалғасып, осы уақыт iшiнде аядай жылыжайдан 15-18 тоннаға жуық қияр жиналып, орталық базарға саудаланып келедi. Көктемнiң алғашқы айларында қиярдың алды 400 теңгеден сатылса, соңғы өнiмi 100 теңгеден түседi. Жылыжайдың тиiмдi жағы жыл он екi ай жұмыс тоқтамайды. Биыл қиярдың «Киртон» дақылын ектiк, өнiм негiзiнен 35-40 күнде пiседi. Бұл кәсiптi бастауға “Жұмыспен қамту – 2020” бағдарламасы бойынша “Түркiстан несие” мекемесiнен 5 жылға 5 млн теңге 9,5 пайызбен несие алдым. Өнiмдi жинау маусым кездерiнде ауылдан 7-8 адамды жұмысқа тартамыз. Оларға күнделiктi атқарған жұмысына қарай төлеймiз. Жылына екi рет өнiм аламыз. Алдағы уақытта осы шаруашылықты одан әрi ұлғайтып, табысты еселеудi жоспарлап отырмын, – дейдi бiзбен әңгiмесiнде Зухриддин Мухаммедов.
Қуаныш ТАСЫБАЕВ,
“Түркістан”.
