Қ.А.Ясауи кесенесіне саяхаттап немесе зиярат етіп келген туристтер мен қала қонақтарына ұялы телефонмен (смартфондар) отбасылық суретке, яғни коммерциялық емес мақсатта фотоға түсуге рұқсат берілген. Сондай-ақ, жарқылдағы бар (вспышка) фотоаппараттан зиян келмейтін экспонаттар алдында түсірілім жасауға болатындығын еске сала кетейік. Тек қана жарқылдағы бар фотоаппараттың зияны келетін экспонаттар алдында фотоға түсуге тыйым салынады. Ондай экспонаттардың жанына музей қызметкерлері тиісті белгілер орнатқан және үнемі бақылауда ұстайды.
– Фотоға түсіру қызметі ақылы қызметтер тізбесіне министрліктің бұйрығы негізінде енгізіліп, еліміздің музейлерімен заң аясында жүзеге асырылып келеді. Қазақстан музейлеріне келушілер тарапынан ұсыныстардың көптеп түсуіне байланысты бұл мәселе министрлік жанынан құрылған көркемдік кеңесте Қазақстан музейлері қызметкерлерінің қатысуымен үстіміздегі жылдың 12-қыркүйегінде өткен жиында кеңінен талқыланды. Жиын аясында заңнамалық актілерге тиісті өзгертулер мен толықтырулар енгізу мәселесі қаралды. Көркемдік кеңестегі қабылданған шешімдер негізінде жарқылдағы бар (вспышка) фотоаппаратпен зияны келмейтін жәдігерлер алдында коммерциялық емес мақсатта фотоға түсуге болатындығы мәлімденді,- деді «Әзірет Сұлтан» тарихи-мәдени қорық-музейінің баспасөз өкілі Дәулет Қожамұратов.
Аталған көркемдік кеңестегі қабылданған жаңа қадамдар заңнамалық актілерменен бекітіліп, жүзеге асырылуда. Ендеше, Қ.А.Ясауи кесенесіне бара қалсаңыз осы жайтты естен шығармағаныңыз абзал.
