Құрметті түркістандықтар!
Сіздерді көктемнің алғашқы күнімен қатар келетін 1 наурыз – Алғыс айту күнімен шын жүректен құттықтаймын!
Алғыс айту күні – тек өткенге тағзым ету ғана емес, сонымен бірге болашаққа сеніммен қарау мерекесі. Біз бір-бірімізге қолдау көрсетіп, мейірімділік пен бауырмалдықты арттыра білсек, еліміздің болашағы жарқын болатынына күмән жоқ. Бұл мереке – халықтар арасындағы достық пен бірліктің, татулық пен ризашылықтың символы. Өткен ғасырда тағдырдың жазуымен түрлі халықтар өз еркінен тыс Қазақстан жеріне қоныс аударды. Сол бір ауыр кезеңдерде қазақ халқы өзге ұлт өкілдерін бауырына басып, туғанындай қабылдады. Ашаршылық пен соғыс қиындықтарына қарамастан, мейірімділік пен адамгершіліктің үлгісін көрсетті. Біз қазақ халқының сол кеңпейілділігі мен жанашырлығын ешқашан ұмытпаймыз.
Бүгінде біз осы қасиетті жердің ажырамас бөлшегіміз. Қазақстанда бейбіт өмір сүріп, еңбек етіп, ұрпағымызды тәрбиелеп, ортақ Отанымыздың дамуына үлес қосып келеміз. Бұл – тек қазақ халқының ғана емес, елімізде тұратын барлық этнос өкілдерінің ортақ жетістігі. Өйткені бізді біріктіретін басты құндылық – бірлік пен татулық.
Қазақ халқына және осы елдің әрбір азаматына шексіз ризашылығымызды білдіреміз! Біз бейбітшіліктің, тұрақтылықтың және достықтың қадірін білеміз. Сол себепті осы құндылықтарды көздің қарашығындай сақтап, келер ұрпаққа аманат ету – біздің ортақ парызымыз.
Бүгінгі айтылған әрбір алғыс сөздеріміз жүректерге жетіп, ізгі істердің артуына себепші болсын! Баршаңызға зор денсаулық, бақ-береке, ырыс пен ынтымақ тілейміз! Қазақстанымыз өсіп-өркендей берсін, ынтымағымыз мәңгі жасасын!
Курбанбай РЫСБЕКОВ,
Сауран ауданы Өзбек этно-мәдени бірлестігінің төрағасы.