Түркістан қаласының Қоғамдық кеңесінің кезекті отырысында қала әкімі мен мәслихат төрағасы есеп берді. Мақсұт Атанбаев төрағалық ететін кеңес отырысы осы сейсенбіде өтті. Күн тәртібінде төрт мәселе қаралды. Соның алғашқысында шаһар басшысы Әзімбек Пазылбекұлының есебі тыңдалды. Өткен жылдың еншісінде атқарылған жұмыстар аз емес. Әр салада алға ілгерілеушілік те бар. Десе де жетістіктерге тоқмейілсімей биыл да қыруар жұмыстар жоспарға еніп отырғанына тоқталды әкім.
Есепті баяндаманы қала әкімінің орынбасары Талғат Төлегенов оқып, былтырғы жылы атқарылған жұмыстарды атап өтті. Жалпы атқарылған жұмыстардың нәтижесінде қаланы сипаттайтын басты көрсеткіш жалпы өңірлік өнім көлемі облыс орталығы болғалы 4,5 есе өсіп 2023 жылы 370,8 млрд. теңгені құраса, 2024 жылға өсім 14,4%-ды құрап, 452,6 млрд. теңгеге жеткен. Ал осы жылға жалпы өңірлік өнім көлемін 462,7 млрд. теңгеге жеткізуді межелеп отыр екен жергілікті билік. Сонымен бірге, кейінгі 4 жылда негізгі капиталға тартылған инвестиция көлемі 1,3 трлн. теңгені құраса, оның 46 пайызы жеке инвестиция есебінен болған. Ал межелі мерзімде тартылған инвестиция көлемі өткен жылмен салыстырғанда 20,3%-ға артқан.
Осы орайда Қоғамдық кеңес мүшесі Базарбай Мұсабеков бағаны тұрақтандыруға қатысты сауалын жолдады. Ол бойынша әлеуметтік маңызы бар азық-түлік тауарларының бағалары халыққа қолжетімді болу мақсатында қаламыздағы 26 әлеуметтік дүкендерге (Түркістан ӘКК, Баға тұрақтандыру қоры) және 3 ірі сауда нүктелеріне (Дастархан, Бәйтерек, Береке) әлеуметтік маңызы бар 19 азық-түлік тауарлары тұрақты түрде жеткізіліп отырғанын, алдағы уақытта тағы қосымша әлеуметтік дүкендердің санын 15-ке арттыру жоспарланып жатқанын айтты. Және де қаланың халық көп шоғырланатын аумағында азық-түлік жәрмеңкелері тұрақты ұйымдастырылып жатқанын оның ішінде бағасы аспандап тұрған картоптың бүгінгі күнде 2 базарда картоп («Алтын Бұлақ» (әр дүйсенбі), «Қуаныш» (сейсенбі, бейсенбі, сенбі) 1 кг – 100 теңгеден, сиыр еті («Қуаныш» (сейсенбі, бейсенбі, сенбі) 1 кг – 2000 теңгеден сатылып жатқанын жеткізді баяндамашы. Айта кетерлігі, жауапты салалар тарапынан күнделікті көтерме сауда базарларына, ірі супер маркеттерке, жеке дүкендерге тұрақты түрде мониторинг жұмыстары жүргізіліп, бағаның үстемесін 15%-дан асыра-ған 48 дүкен иесіне заң аясында тиісті шаралар қабылданған.
Бұдан бөлек кеңес мүшесі Бекахмет Абусейітов қала аумағында туристерге қызмет көрсететін қонақ үйлердің кейбіріне баратын жолдардың сапасы сын көтермейтіндігі, сол жолдарды алғашқы кезекте жөндеуге мән берілуін ұсынды. Ол мәселе басшылық назарында екендігін алған тартқан баяндамашы жол жөндеу жұмыстары кезеңімен іске асырылатынын жеткізді. Тағы бір сұрақ Түркістан қаласын ауыз сумен қамту мәселесіне арналды. Бұл жөнінде кеңес мүшесі Мәлік Дәулетов Кентау қаласынан келетін ауыз судың алдағы уақыттарда қоры азаятынын еске салып, тұрғындар-ды ауыз сумен қамту бойынша Түркістан қаласының аумағында жерасты су көлемін анықтауға қатысты жұмыстар жөнінде сұрады. Бұған қала әкімі бүгінгі таңда тиісті зерттеу мекемелері арқылы анықтау шараларына қадам жасалып жатқанын, алдағы уақытта тиісті қорытынды жасалатынын айтты. Оған қоса 2030 жылға дейін Түркістан қаласының тұрғындары-на беріліп жатқан ауыз су қорының көздеріне қатысты мәселе туындамайтындығын атап өтті.
Осылайша кеңес отырысында өзге де халық игілігіне бағытталған сауалдар көптеп қойылды. Соның ішінде туризм саласын дамыту, Түркістан қаласына ерекше мәртебе беру жөніндегі жұмыстар да сөз болды. Бүгінде Мемлекет басшысының бастамасымен Түркістан қаласына ерекше мәртебе беру туралы заң жобасы әзірленіп, Парламент Мәжілісі мен Сенатта қолдау тапқан. Енді ел Президентінің қарауына ұсынылған. Заң жобасы Түркістан қаласының бірегей тарихи, сәулеттік, мәдени мұрасы бар және Қазақстан Республикасының рухани-мәдени және тарихи орталығы ретінде танудың негізі болып табылады. Құжат қолданысқа енетін болса Түркістан қалалық мәслихатына 9 құзырет және Түркістан қаласы әкімдігіне 35 құзырет беру қарастырылған. Заңда бір қатар мәселелер қаралады, оның ішінде:
– Түркістан қаласын рухани-мәдени және тарихи орталық ретінде дамыту;
– Қаланың мәдени игілігі мен рухани дамуына және тарихи мұра объектілерін сақтау;
– Кесененің айналасындағы құрылыс стандарттарын және қала аумағында бірыңғай құрылыс стилін қолдану;
– Қала аумағында өңірлік нышанды әзірлеу және пайдалану тәртібін бекіту;
– Қалада қызмет көрсету деңгейін жетілдіріп, ұлттық қолөнер саласын дамытуға қаржылай қолдау;
– Туристік бизнес өкілдерін ынталандыру шаралары;
– Жергілікті әкімдік пен мәслихаттың құзыреттері кеңейеді.
Түркістандықтар күткен заңның негізгі басымдықтары осындай. Алдағы уақытта бұл жөнінде толығырақ жазатын боламыз.
Күн тәртібіндегі екінші мәселе бойынша Түркістан қаласы мәслихатының төрағасы Ғаппар Сәрсенбаев мәслихаттың 2024 жылы атқарған жұмыстары бойынша баяндама жасады. Өткен жылы мәслихатта 15 сессия, тұрақты комиссиялардың 42 отырысы өткізілген. Нәтижесінде 65 мәселе қаралып, шешім қабылданған. Оның ішінде 14-і нормативтік құқықтық актілер. Мәслихаттағы жалпы 18 депутат 57 қоғамдық қабылдаулар өткізіп, 200-ге тарта азаматтың мәселесін тыңдаған. Осы тұрғындардың мәселелерімен қатар, халық қалаулыларының тарапынан жергілікті атқарушы органдарға 115 сауал, жолданым хаттар жолданған.
Иә, бұл қағаз бетіндегі ақпараттар. Былайғы уақытта депутаттардың нақты жұмысына халық куә, бағасын да ел береді. Осындай ұстаныммен бірқатар, ұсыныс-пікірлерін жолған кеңес мүшелері қалалық мәслихат төрағасы Ғаппар Амантайұлының баяндамасын назарға алып, атқарылған жұмыстарға қанағаттанарлық бағасын берді.
Қоғамдық кеңестің жұмыс тәртібіне сай кеңес төрағасы да мүшелерінің алдында есеп беруі тиіс. Осыған орай Мақсұт Рахымбекұлы да өткен жыл ішінде атқарылған жұмыстары бойынша есепті баяндамасын ұсынды. Газетіміздің жыл басындағы сандарының бірінде Қоғамдық кеңес төрағасынан арнайы сұхбат алғанбыз. Сол кезде жыл көлемін-дегі жұмыстарға шолу жасап, кеңес жұмысына жан-жақты тоқталған-быз. Отырыс барысында да кеңес мүшелері толықтай хабардар екенді-гін алға тартып, бірауыздан төраға жұмысын оң бағалады.
Жиын қорытындысында күн тәртібіндегі екі мәселе қаралды. Атап айтсақ, Түркістан қаласы бойынша шетелдіктер үшін 2025 жылға арналған туристік жарна мөлшерлемелерін бекіту туралы қалалық мәслихат шешімінің жобасы және 2025 жылы Ұлы Отан соғысындағы Жеңістің 80 жылдығы мерекесіне орай қосымша материалдық көмек көрсету туралы мәслихат шешімінің жобасы Қоғамдық кеңес тарапынан да қолдауға ие болды.
«Түркістан-ақпарат».