Бүгін облыстық аумақтық сайлау комиссиясының бастамасымен Халықаралық туризм және меймандостық университетінде Дүниежүзілік сайлау күніне арналған кездесу өтті. Іс-шара мақсаты – Тәуелсіз Қазақстанның қалыптасу тарихымен тығыз байланысты еліміздің сайлау жүйесінің қалыптасу және даму кезеңдері туралы жұртшылықты ақпараттандыру, сайлаушылардың электоралдық белсенділігін арттыру.
Жиынға облыстық сайлау комиссиясының мүшелері, мемлекеттік органдардың өкілдері, сарапшылар, қоғамдық ұйымдар, жоғары оқу орындарының оқытушылары мен студенттері қатысты. Форум аясында сайлау жүйесінің дамуы, электоралдық процесстердің ашықтығы және демократиялық құндылықтарды ілгерілету тақырыптарында баяндамалар оқылды.
Жалпы Түркістан облысы аумақтық сайлау комиссиясының бекіткен жұмыс жоспарына сәйкес аудан, қала бойынша 500-ге жуық іс-шара өткен. Оның ішінде, дөңгелек үстелдер, саяси партия, коммерциялық емес ұйымдарының мүшелерімен және БАҚ өкілдерімен кездесулер, жастарға арналған форумдар ұйымдастырылған. Бұдан бөлек, әр аудандағы мектептерде аудандық сайлау комиссиялары білім бөлімдерімен бірлесіп викториналар, конкурстар, дебаттар секілді интерактивті іс-шаралар өткізген.
Айта кетейік, облыс бойынша халық саны 2 млн. 163 мың тұрғын болса, оның ішінде 1 млн 192 мыңға жуық сайлаушылар бар.
Түркістан облысының Өңірлік коммуникациялар қызметі