Ордабасы аудан әкімі Азат Оралбаев көтерілген ұсыныстар мен өзекті мәселелердің орындалу барысына тоқталып өтті.
Тарқатып айтар болсақ, тұрғындар тарапынан жол жөндеу, көше жарығын орнату, ойын алаңшасын салу сынды 10 ұсыныс-пікір келіп түскен.
Мәселен, оңды шешімін тапқан мәселелердің бірі Дербес елді мекені С.Мұқанов ЖОМ баратын ұзындығы 650 м Ташев көшесіне жарықтандыру құралдары орнатылса, Ордабасы елді мекеніндегі 2 шақырымды құрайтын Орталық көшеге жарықтандыру құралдары орнатылған.
Бадамдықтармен кездесуде аудан басшысы ауылдағы бірқатар өзекті мәселелерді тізбелеп, оңды шешу бойынша тиісті құрылымдық бөлімдерге тапсырма берді.
Қазіргі таңда округ аумағындағы Орда мөлтек ауданының 15 шақырымдық ішкі көшелеріне тас төсеуді қажет етеді. Өткен жылы ауруханаға барар 1,5 шақырымдық жол асфальтталды, 2024 жылы топырақ жолдарға тас төсеу бойынша ЖСҚ әзірленуде.
Сонымен қатар, ауыл, елді мекендердегі қоқыс полигонын заңдастыру бойынша да жүйелі жұмыстар қолға алынып, Ордабасы ауылынан полигон салуға 5 гектар жер телімі бекітілген.
Аудан басшысы есепті жиында ауылдарды таза, сапалы ауыз сумен қамтамасыз ету бағытында Ордабасы ауылына басталған ауыз су жүйелерін бітіріп пайдалануға беру бойынша да айтып өтті. Әрі осы ауылда балалар ойын алаңшасын салу бойынша сметалық құжаттама жасалып, келесі жылдың бюджетіне қаржы қарастыруға ұсынылатынын жеткізді.
Мемлекет басшысының тапсырмасымен қолға аланған «Ауыл аманаты» бағдарламасының өңірлерде орындалуы басты назарда.
Ауданамыздан аталған жобаға Бадам ауылдық округі қатысқан болатын. Қазір таңда ауылда 5 ауыл шаруашылығы өндірістік кооперативі ашылып, 216 азамат мүше болып тіркелген.
Бүгінде Ырыс МҚҰ 147 ауыл азаматы құжат өткізген, құны 837,4 млн. теңге, оның ішінде 105 жоба мақұлданған, жобалар құны 688,0 млн. теңгені құрап отыр. 88 жобаға 557,5 млн. теңге қаржы бөлінген.
Есепті кездесу барысында ауыл тұрғындары таза су, ортақ жайылым, инфрақұрылым мәселелері бойынша ұсыныс-пікірлерін айтып, аудан әкімінен нақты жауап алды.
Кездесуден соң Азат Әбдіғалиұлы Бадам ауылдық округіндегі бірқатар өндіріс орындарына барып өндіріс барысын аралап көрді.
Бұдан бөлек аудан әкімі Азат Оралбаев Бадам ауылдық округінде «Ауыл аманаты» бағдарламасы бойынша несие алып, іс бастаған тұрғындардың жұмысымен танысты.
Әуелі аудан басшысы аталған бағдарлама арқылы 27 млн теңге алып, сүт, ірімшік өндіретін автоматтандырылған техника алған «Бес бота» кәсіпкерлік мекемесінің цехы орналасқан ғимаратты аралап, кәсіпкермен өндіріс қуаттылығы бойынша әңгімелесті.
Мұнан соң аудан әкімі «Нұр-Айша» шаруа қожалығының 1,5 гектар алқапты алып жатқан жылыжай кешеніне барды. Онда кәсіпкердің базарға шығаруға дайындаған құлпынай жемісінің өнімділігі, шығын мен табыс көлемі жайында өзара пікірлесті.
Кәсіпкердің айтуынша Түркия елінен әкелінген сорттар жерсіндіріліп, алғашқы өнімдер жуық арада нарыққа шығарылмақ. Орташа түсім бойынша табыс 30-40 млн теңге болады деп жоспарлауда.
Аудан әкімі жылыжай кешенінің басшысының бастамасына сәттілік тілеп, агросекторға байланысты мемлекеттік қаржылық бағдарламаларға қатысып, өндіріс көлемін ұлғайту жөнінде айтып өтті.
Бадам ауылдық округінде «Ауыл аманаты» бағдарламасына қатысқан Досан Пірмаханбетов жеңілдетілген пайызбен 8 млн теңге алып, кәсіп бастаған.
Бүгінде үйіргелік 10,5 соттық жерден жылыжай шаруашылығын ашып, қияр өсіруде. Аудан басшысымен пікірлескен шаруа алдағы 1-2 айда дайын көкөніс өнімдерін базарға шығармақшы. Аудан әкімі округтің орталық көшелерін аралап, жол бойының келбетін ретке келтіру, көгалдандыру бойынша да салалық бөлімдерге тапсырма берді.
Ауылды аралаудан соң Азат Әбдіғалиұлы ауылдық округ әкімінің өткен жылғы атқарған жұмыстары және биылғы жоба-жоспарларын қарап, бірқатар ұсыныс-пікірлер айтты.
Сонымен қатар Ордабасы ауданының әкімі Азат Оралбаевтың ауылдық округтердегі есепті кездесуі Төрткүлде жалғасын тапты. Есепті жиында аудан басшысы өткен есепті кезеңде ауыл тұрғындары тарапынан көтерілген ұсыныс-пікірлердің орындалу барысына тоқталды.
«Бүгінгі кездесуге дейін тұрғындардан келіп түскен ұсыныстар мен өзекті мәселелерді саралап, іске асыру бағытында жұмыс жүргізілуде. Кейбір ауқымды мәселелерді шешу үшін бюджеттен қаржы қарастыру қажет. Оның өзі қосымша уақыт талап етеді. Сондықтан ауылдың өзекті мәселелері кешенді зерделеу жұмыстарының нәтижесінде өз кезегімен шешімін табатын болады. Биыл жаз айында өткен кездесуде округ аумағынан 7 ұсыныс-пікір келіп түсіп, қазіргі таңда аталған мәселелер бойынша жұмыстар жүргізілуде», деді аудан әкімі өз сөзінде. Ауыл тұрғындары осыдан бұрынғы кездесулерде ауылдың мәдениет үйінің техникалық базасы туралы мәселе көтерген болатын. Аудан әкімінің тапсырмасымен 2,5 млн. Теңгеге қажетті жабдықтар сатып алынса, тұрғындар айтқан көше жол белгілері, жарықтандыру мәселесі қысқа уақыт ішінде оңтайлы шемін тапты. Бүгінде ауылдың ПМК аумағындағы электр желілері және бағаналары толығымен жаңартылды. Елді мекеннің 15 басты көше бойына жол белгілері орнатылды.
«Батыс Еуропа — Батыс Қытай» халықаралық транзиттік дәлізі бойында орналасқан ауыл тұрғындары үшін үлкен мүмкіндіктің бірі шағын кәсіпкерлікті дамыту.
Осы бағыттағы жұмыстарды жетілдіру үшін аудан әкімі есепті кездесуде шаруаларды мемлекеттік бағдарламаларға қатысып, әл-ауқатын жақсартуға шақырды. Осы бағыттағы жобалардың санын көбейту үшін округ әкімі мен салалық бөлімдерге нақты тапсырма берді.
Сондай-ақ, аудан басшысы тұрғындармен кездесуде Төрткүлдегі өзекті мәселелерді атап өтіп, шешу жолдарын баяндады.
Мәселен, Көкарал елді мекенінен жаңадан фельдшерлік-акушерлік пункт құрылысын салу, Төрткүл елді мекенінің ауыз су мәселесі, Көкарал, Еңбекші елді мекендерінің ауыз су мәселесі, Көкарал елді мекенінде құрылысы тоқтап тұрған табиғи газбен қамту жөнінде сөз қозғады. Аудан басшысының мәлімдеуінше ФАП құрылысын жүргізу 2023-2024 жылдарға жоспарланса, Көкарал, Еңбекші елді мекендерінің ауыз су жүйелерін қайта құру бойынша жобалау-сметалық құжаттама әзірленіп, облыстық Энергетика және тұрғын үй-коммуналдық шаруашылық басқармасына 2024 жылға қаржы қарастыруға сұраныс жолданған. Ал, Көкарал елді мекенінде құрылысы тоқтап тұрған табиғи газбен қамту құрылысын қайта жандандыру мақсатында жобалау-сметалық құжаттамасы әзірленіп, Түркістан облысының энергетика және тұрғын үй-коммуналдық шаруашылық басқармасына қаржы қарастыруға ұсыныс берілген. Қаржысы шешілген жағдайда келер жылы құрылыс жұмыстары жүргізілмек.
Аудан әкімі Азат Әбдіғалиұлы есепті кездесу соңында тұрғындарды мәселелері бойынша жеке қабылдап, жарықтандыру, ортақ жайылым, жер, газдандыру, тазалық мәселесі бойынша сұрақтарына жауап беріп, жауапты сала басшыларына халықтың мәселесін уақытылы, сапалы етіп шешуді міндеттеді.