Мемлекеттік қызметкер десе сізге қандай тұлға елестейді? Иә, жалпы сырт келбеті «биліктің өкілі» екендігін көрсететін, мемлекеттің саясатын, әрбір бастамасын жүзеге асыруға аса жауапкершілікпен қарайтын жандардың елге жасаған қызметінен аталмыш сауалдың жауабын аңғару қиын емес.
ҚР Тұңғыш Президенті Н.Назарбаевтың 1998 жылғы 20-қаңтардағы Жарлығына сәйкес 23 маусым – Мемлекеттік қызметшілер күні. Айтулы дата – халыққа қызмет етуді мақсат тұтқан жандардың кәсіби мерекесі.
Осы тұрғыда халықтың оларға деген көзқарасын білмек ниетте әлеуметтік желідегі парақшамыз (turkistan_gazeti) арқылы «Мемлекеттік қызметте жұмыс істеуге көзқарасыңыз қандай?» деген сауал жарияладық. Жалпы 68 адам дауыс беріп, оның 41-і оң, 27-сі теріс пікір білдірген. Нәтижесінде халыққа қызмет етуді қолдайтындар қатары басым түсті. Жақсы көрсеткіш.
Жалпы, мемлекеттік қызметші деген кім? Осы сөздің төңірегін қамтысақ. Ел мүддесі үшін шынайы еңбек етіп, отымен кіріп, күлімен шығатын жандар деп бірден бір мемлекеттік қызметшілерді атай аламыз. Сайып келгенде мемлекеттік қызметкер – халықтың қызметшісі. Оның сырт келбеті, сөйлеу мәнері, іс-қимылы барлығы дерлік алдына келген адамға үлгі болуы тиіс.
Ал біз, осынау жауапкершілік жүгі ауыр міндетті абыроймен атқарған, өзінің жан-жақтылығымен көпшілікке мәлім, мемлекеттік қызметтің жандануына өз үлесін қосқан, зейнет жасындағы Ұлжан Мұстафаева жайлы айтпақпыз.
Биыл Пайғамбар жасына аяқ басқан Ұлжан Әбенқызы бүгінде қалалық әйелдер алқасының төрайымы. Еңбек жолы елеулі істермен өріліп, атқарған еңбегі үшін қаламыздағы әйелдер қауымы арасында бірінші болып Түркістанның «Құрметті азаматы» атанды. Оның осындай үлкен шарада шынайы көңілі мен ерекше қолғабысын көрген әкім Өмірзақ Әметұлы нәзік жанға «Мәдениет және тілдерді дамыту» бөлімін басқаруды ұсынады. Осылайша, 2001 жылдан бастап мемлекеттік қызметке кірісті. «Бұл қызметтің қызығы мен қиындығы да қатар жүреді», – деген Ұ.Мұстафаева мемлекеттік қызметтегі еңбек жолын былайша еске алады:
– Әр үш жыл сайын аттестациядан өтеміз. Бұл жерде ел ішіндегі қызметіңмен қатар заңды жетік білуің керек. Өйткені, біздің жұмыс заң аясында өрбуі тиіс. Мемлекеттік қызметтің өзіне тән ішкі тәртібі бар. Өзіңе жауапкершілік жүктелген соң, міндетімізді адал атқаруға тырыстық. Адам болған соң, кейде қызметтің талаптарын ауырсынып, қынжылатын да кезіміз болатын. Бірақ, өзімнің таңдауым және ел алдында Ант қабылдап, «осы қызметті мінсіз атқарамын»,- деген соң сол үдеден шығуға тырыстым. Бүгінде сол еңбегімнің нәтижесі шығар, өзімнен кейінгілерге жол көрсетіп, аға буын өкілі ретінде әлі де елге қызмет етіп келемін. Мемлекеттік қызметте талай ауыртпалықтарды басымнан өткердім. Ер азаматтармен қатар иық теңестіре жұмыс жасадым. Бірақ, мойыған жоқпын. Мені осы мемлекеттік қызмет шыңдай түсті. Күресуді үйретті. Мұндағы айтпағым, мен жеке басымның пайдасы үшін емес, мемлекет мүддесі үшін яғни, халықтың қызметшісі ретінде елдің игілігіне бойымдағы күшімді жұмсадым деп есептеймін. Соның арқасында төккен тер шетте қалмай 2001 жылы ҚР Тәуелсіздігінің 10 жылдығына орай ОҚО деңгейінде өткізілген «Мәдениетім мерейім» атты фестивальде және 2011 жылы «Тәуелсіздігім тұғырым» атты ҚР Тәуелсіздігінің 20 жылдығына орай өткен фестивалінде екі рет бас жүлде иегері атандық. Мәдениет саласын дамытуға қолымнан келгенінше атсалыстым. Қаламызға қарасты шалғай ауылдардағы мәдениет ошақтарының санын арттыру мақсатында 12 ауыл мен 38 елдімекеннен 20 клуб, 43 кітапхана ашуға атсалыстым. Бөлімге қарасты қызметкерлер саны 15-тен 200-ге дейін өсті. Сондай-ақ, 7 елдімекеннің тарихи атауына қол жеткіздік.
Осы жолда ешкімнің ала жібін аттаған жоқпын. Өңірімізде жастар мен қариялар да Мұстафаева келе жатыр деп сыйлайтыны қуантады. Еңбегімнің қайтарымы осы шығар.
Мемлекеттік қызметке дейін Ұ.Әбенқызы 1973 жылы Шымкент қаласындағы әл-Фараби атындағы Мәдениет институтын оқып жүріп Молдавияға концертке барып, онда «Достық», «Первокурсник» ансамблдерінде би билеп, ән шырқаған. Ал, тұрмыс құрған соң, Жамбыл облысы Мойынқұм ауданындағы мәдениет үйіне директор болып, Мәскеуде де өнер көрсетті. Одан Португалия, Африка, Ирландия, Канада мемлекеттерінде өнер көрсетіп, сосын Түркістанға қайта келіп жұмыс жасады. Сөйтіп жүріп Түркия мемлекетіне Түркістанның жастарын, «Яссы» фольклорлық ансамблін апарып, сол мемлекетте өнер көрсетуіне мұрындық болды. Аталмыш «Яссы» фольклорлық ансамблін өзі 1980 жылы Түркістанға келгеннен кейінгі бір жылдан соң құрды. Сол еңбегі үшін атқарушы билік баспана берген. Ы.Алтынсарин атындағы педагогикалық колледжінде 20 жыл сабақ берді. «Ритмика» пәнін енгізіп, «Би падишасы» атанып, хореографияның өркендеуі үшін тынбай қызмет етті. Талантты жанның өмірінің 39 жылы Есім хан алаңында өткен екен. Онда бір кездері 500-1000-ға жуық бишілерді дайындап, үлкен істің басы-қасында жүрді.
Бүкіл түркі дүниесінің арасында «Тұран аруы» атты байқауды 3 рет, ал «Батагөй ақсақалдар» байқауын бірінші рет Түркістан қаласында өтуіне үлес қосқан да Ұлжан Әбенқызы. Тізбектеп айта берсек, мұндай шаралардың қатары мол.
«Мен өзім басқа мемлекеттерді көріп келгеннен кейін жаңашылдықтарды Түркістанның жастарына көрсеткім келді» деген іскер жан бүгінде 63-ті еңсерсе де мектептер мен өзге де орындарда жастарға тәрбиелік мәні бар шараларды ұйымдастырып жүреді.
«Біз бір күн өмір сүрсек те отырған ортамызға, жастарымызға айтатын әңгімеміз болуы керек. Қолымыздан келіп тұрса, елдің болашағын жарқын етуге неге атсалыспасқа. Менің түсінігімде бұл адамдықтың белгісі», – дейді Ұ.Мұстафаева.
Белсенді жан мемлекеттік қызметте жүріп Түркия мемлекетіне төрт рет іс-сапармен барып, қазіргі таңда Түркия Республикасы, Сивас облысының Құрметті азаматы.
Ұлжан Әбенқызының ұл-қыздары мемлекеттік қызметте болмаса да ел игілігі үшін еңбек етіп жүр. Ұлы Нұрлан Қ.А.Ясауи атындағы қазақ-түрік университетінде жаратылыстану факультетінде оқытушы. Ол білім қуып магистратура, аспирантураны және АҚШ-та білімін жетілдірді. Үлкен қызы Шұғыла ана жолын жалғастырған тәжірибелі хореограф. Кіші қызы Гүлжанат Қазақстан Ұлттық телеарнасында редактор.
Әркез ұжымда абыройлы, қызметтестеріне сыйлы, көпшілікпен сыпайы түрде қарым-қатынаста болатын Ұлжан Мұстафаеваның қызметі осылайша өрілген. Өнері мен қарымының арқасында биік белестерді де бағындырды. Қазір де «шаршадым» дегенді білмейтін Ұ.Әбенқызы жас балғындарға би өнерін үйретіп, қолдан келгенше білгенімен бөлісуде. Расында, адам шынайы талпынса – ол алмайтын қамал жоқ! Оған біз мемлекеттік қызметте абыройлы еңбек еткен Ұлжан Әбенқызының еңбек жолын дәлел ете аламыз.
Осындай талантты да талапты жанның артынан ерген барша мемлекеттік қызметкерлерді мерекесімен құттықтаймыз! Халықтың алғысынан артық қуаныш жоқ. Сондықтан, алар алғыстарыңыз таусылмасын демекпіз. Мейрам құтты болсын!
Іскер жан 2001 жылы Түркістан қаласының «Жыл адамы» атанып, ҚР Президентінің бірнеше Алғыс хатымен марапатталған. 2002 жылы «ҚР Тәуелсіздігіне 10 жыл» мерекелік медалі мен ОҚО гендерлік саясат бойынша «Ең үздік басшы» номинациясын алған. Дәл осы жылы ҚР «Мәдениет қайраткері» атағына ие болды. 2008 жылы ҚР және оның Астанасының дамуы мен қалыптасуына елеулі үлес қосқаны үшін «Астанаға – 10 жыл» медалімен, 2013 жылы Республикалық Кәсіподақ төс белгісімен, 2015 жылы Қазақстан халқы Ассамблеясының 20 жылдық және Қазақ Хандығының 550 жылдық мерейтойына арналған төс белгілерімен марапатталды. 2017 жылы Мәдениет және өнер қызметкерлері күніне орай ОҚО әкімінің сыйлығына ие болып, 2018 жылы ҚР Тұңғыш Президенті Н.Ә.Назарбаевтың Жарлығымен «Ерен еңбегі үшін» медалімен марапатталды.
Жанерке ЖАРЫЛҚАСЫН,
«Түркістан».