Бүгін даңқты боксшы, Олимпиада чемпионы, түркістандықтардың ғана емес күллі қазақ елінің мақтанышына айналған дара тұлға Бекзат Саттархановтың туғанына 45 жыл толуына орай «Жарқ етіп сөнген 20 жас» атты кітаптың тұсаукесері өтті. Бұл кітап – қазақтың қайсар ұлының қысқа ғұмыры мен жарқын жеңістерін баяндайтын естелік, өскелең ұрпаққа үлгі болар рухани мұра. Аталмыш кітаптың тұсаукесеріне қаламыздағы барша мектептерден оқушылар қатысып, тағылымға толы шараның куәсі болды.
Кештің қадірлі қонақтары Түркістанның дара перзенті, Түркі дүниесінің мақтанышына айналған Бекзаттай батырды өмірге әкелген анасы Сырлыкүл Адырбекқызы мен даңқты боксшының, білекті де жүректі батырдың есімін қайта жаңғыртқан, кітаптың авторы Ержан Серікұлы дара тұлға Бекзат Сейілханұлы жайлы, жарық көрген кітаптың жазылу тарихы мен мазмұны жайлы сыр шертті. Кітаптың тұсаукесер кешін Оқушылар сарайының басшысы Индира Сарқытқызы жүргізіп отырды.
Аталмыш кешке Түркия Республикасынан арнайы келген қонақ, профессор Махир Накип 2000 жылы Бекзат Саттарханов олимп шыңын бағындырғанда Қожа Ахмет Ясауи атындағы қазақ-түрік университетінің вице-ректоры болып қызмет еткен екен. Ол өз кезегінде өткен шақты еске алып, Бекзат Саттархановтың жарқын болмысы жайлы сөз қозғап, батырдың анасы Сырлыкүл Шойбековаға ізгі тілегін арнап, жастарды Бекзат секілді болуға шақырып, Бекзат Саттарханов тұтас түркі халықтарының мақтанышы екенін тілге тиек етті. Сонымен қатар, түркінің төрі, екі дүниенің есігі Түркістан қаласында Бекзат Саттархановқа арналған еңселі ескерткіш бой көтерсе деген ақжарма тілегін білдірді.
Сондай-ақ, ҚР еңбек сіңірген жаттықтырушысы, профессор Жақыпбек Айдарбекұлы да Бекзат Саттарханов жайлы, оның арман-мақсаты жайлы өз естеліктерімен бөлісті. «Жарқ етіп сөнген 20 жас» кітабының тұсауын Бекзат батырдың анасы Сырлыкүл Шойбекова, Түркістан музыкалық драма театрының басшысы Әлімхан Мырзахан, Оқушылар сарайының басшысы Индира Икапова, ҚР еңбек сіңірген жаттықтырушысы, профессор Жақыпбек Айдарбекұлы кесті.
Кеш барысында Бекзатқа арналған әндер шырқалып, мағыналы естеліктер айтылды. Кеш соңында ер Бекзаттың анасына жаңадан жарық көрген кітап мұқабасындағы батырдың бейнесі салынған суреті сыйлыққа берілді. Суретті белгілі суретші Омар Бабажанов салған болатын. Жыл басталғалы ер Бекзаттың туған жері, түркінің төрі Түркістан шаһары батырын ұлықтап түрлі іс-шаралар мен кездесулер, спорттық сайыстар мен дүбірлі додалар өткізуде. Сол бір игілікті бастама әлі де жалғасып келеді.
Барлық кездесуде чемпионның анасы Сырлыкүл Шойбекова өзінің өмірлік ақыл-кеңестерімен және Бекзат жайлы естеліктерімен бөлісіп, қойылған сұрақтарға көркем түрде әрі байыппен жауап берді. Бекзат Саттархановтың әкесі Сейілхан Саттарханов 2020 жылы жүрек ауруынан қайтыс болған еді…
Азамат ӘЛІБЕК.