Бүгін қалалық төтенше жағдайлар басқармасының бір топ қызметкерлері шаһар бойынша рейдтік іс-шара жүргізді. Қалалық әкімдіктің автотұрағынан басталған іс-шара бірнеше секторлардағы қауіпті учаскелерді аралауға ұласып, жауапты мамандар сол аймақтарға ескертпе тақтайшалар орнатты.
Сондай-ақ, қала тұрғындарына жаз мезгілінде суға шомылудан болатын қауіп-қатерлердің алдын алу жөнінде түсіндірме жұмыстары жүргізіліп, нұсқаулық парақшалар таратылды.
Рейд кезінде қауіпті аймақтарда суға шомылып жүрген бүлдіршіндерге мамандар ескертпе жұмыстарын жүргізіп, балалардың ата-аналарына да ескерту жасады.
Айта кетейік, қалалық төтенше жағдайлар басқармасы ата-аналардың қарауынсыз суға түскен жеткіншектер мен мас күйде шомылған азаматтарға, сонымен қатар, суға түсу кезінде қауіпсіздік ережелерін бұзған азаматтарға шара қолданатынын жеткізді.
Дәурен ТІЛЕУХАН.