Қыркүйек жақындағанда Түркістанның базарында аяқ алып жүру мүмкін емес. Өйткені, тамыздың соңында балалары мектепке баратын ата-ананың барылығын дерлік сауда орталығынан кезіктіресіз. «Балам жұрттан кем болмасын» деп тірнектеп жаз бойы жинағанын, қолында барын, болмаса қорадағы малын сатып, қаржысын ұл-қыздарының киіміне құятыны рас. Тіпті, сол мезгіл таяған шақта оқуға қажетті құрал-жабдықтар мен киім-кешектің тым қымбаттап кететіні де жасырын емес. Бұған біреудің қолы жетсе, енді біреуінікі жете бермесі анық. Осы орайда дәстүрлі «Мектепке жол» республикалық акциясы қолға алынған болатын.
Аталмыш шара аясында Түркістан қалалық ардагерлер мен аналар алқалары бірігіп оқушыларға қуаныш сыйлады. Қалалық мәдениет үйінде арнайы салтанатты жиын ұйымдастырылып, жаңа оқу жылын бастағалы тұрған бүлдіршіндерге киімдер берілді. Қала әкімі Р.Аюпов бұл игі бастамаға арнайы қатысып, ұйымдастырушыларға алғысын білдірді. Мейірімді болуға шықырып, үлестіретін сый-сияпаттарды балаларға өз қолымен табыстады. Қайырымдылық акциясы әлеуметтік жағынан аз қамтылған және көпбалалы отбасыларды қамтыды.
«Облыс пен қала әкімдігі және ардагерлер, аналар алқаларына алғысымды айтамын. Бүгін міне қанша баланың жүзіне күлкі үйірілтіп қуаныш сыйладыңыздар. Бірінің ата-анасы жоқ болса, енді бірі көпбалалы отбасыдан шыққан балалар. Бұл игі істеріңіз әсіресе ата-анаға үлкен көмек болды деп ойлаймын. Менің 15 немерем 4 шөберем бар. Соның екеуі осы көмекке қол жеткізді. Барлық киімдері, қыстық жылы киіміне дейін бар екен», – деп бізбен қуанышын бөлісті қала тұрғыны Нүрзипа Ембердиева.
Айта кетейік, «Мектепке жол» акциясы қала көлемінде кеңінен қолдау табуда. Бұған «Қамбар ата» әлеуметтік дүкені сүбелі үлес қосып келеді. Олай деуімізге себеп, мұнда қытайдың қара базарындағы арзанқол киімдер емес, кезкелгеннің қолы жете бермейтін танымал фабрикалардың өнімдері оқушыларға жол тартуда. Тек мектептегі социолог маманның немесе білім бөлімінің ұсынысы бойынша нақты әлеуметтік жағынан аз қамтылған жанұяларға киімдей көмек берілуде. Игі шараға соғыс және еңбек ардагерлер кеңесі мен жеке кәсіпкерлер ұйытқы болып, көпке үлгі болуда. Аталмыш кеңес төрағасының орынбасары Пернетай Досыбековтың айтуынша киіммен қамтамасыз еткен белгісіз кәсіпкер, жасаған жақсылығын рия еткісі келмеген.
Орынбек ҚАСЫМБЕКОВ,
«Түркістан».