Мемлекеттік қызмет саласына жиырма жылға жуық уақытын арнаған Сәкен Ханділлаев қалалық мәслихаттың депутаты қызметіне кіріскенге дейін әкімшілік жүйенің қыр-сырын меңгерген. Еңбек жолын мемлекеттік мекемеде қарапайым маманнан бастап қала әкімінің орынбасары лауазымына дейін тағайындалған депутат – «Елге қызмет – абыройлы міндет» деген пікірде. Сұхбаттасу кезінде халық қалаулысы қызметтік мәнсабы мен жеке өміріне қатысты риясыз ашық пікір алмасты.
– Сәкен Мырзанұлы депутаттыққа түсудегі мақсатыңыз қандай еді? Сайлауалды бағдарламаңызда айтылған жоспарыңыз қаншалықты жүзеге асты?
– 2016 жылы «Nur Otan» партиясынан қалалық мәслихаттың депутаттығына үміткер ретінде ұсынылған болатынмын. Сайлауда көпшіліктен қолдау тауып, депутаттық қызметке кірістім. Партия ұсынғаннан кейін бірінші кезекте тұрғындарға жайлы жағдай жасап, сапалы электр энергиясымен, таза ауыз сумен қамту, газдандыру жүйесі, жол-көлік инфрақұрылымдарын, жалпы алғанда қаланың әлеуметтік-экономикалық дамуын жандандыру басты мақсатым болды. Сайлауалды бағдарламамдағы жоспарларымды орындауда аянып қалған емеспін. Халық сенім артқан соң, тұрғындардың сеніміне селкеу түсірмеу азаматтық парызым деп білемін.
– Халықтың артқан сенімін қаншалықты ақтай алдым деп ойлайсыз? Қалалық мәслихаттың депутаты ретінде қандай мәселенің шешімін табуға ұйытқы болдыңыз?
– Түркістан қалалық мәслихатының құрамындағы 18 депутаттың барлығы да білімді, білікті, түрлі саланың майталман мамандары. Әріптестеріммен қаланың сан-салалы өзекті мәселелерін талқылап, оң шешім шығаруға ықпал жасап отырмыз. Республикадан бөлінетін бюджет мәселесі де, сонымен қатар қаланы абаттандыру, көгалдандыру, жол-құрылыс саласындағы өзгерістер мен толықтырулар депутаттардың мақұлдауымен жүзеге асырылады. Жауапкершілік орасан, шешімнің жауабы халықтың ризашылығымен өлшенеді. Шынында, мен өзімнің тарапымнан жасалған кез келген ісімді жария еткім келмейді. Бағасын жұртшылықтың өзі береді деген ойдамын. Дегенмен де, «Мектепке жол» акциясы аясында әлеуметтік жағдайы аз қамтылған отбасылардың балаларына мектеп формасы және оқуға қажетті құрал-жабдықтармен қамтуды дәстүрге айналдырғанмын. Көмек сұраған жанның бетін қайтаруға жеке басым дәтім шыдамайды. Сондықтан мүмкіндігінше қол ұшын созуға дайын тұрамын.
– Қызметтік жолыңыз қалай өрілді? Түркістан қалалық мәслихатының депутаттығына өкілеттілік мерзіміңіз аяқталған соң үміткер ретінде кандидатураңызды екінші рет ұсыну ойыңызда бар ма?
– Алдымен өмірдерегіме қысқаша тоқталып өтсем. Түркістан қаласында туып-өстім. Жанұяда 3 ұл, 3 қыз тәрбиелендік. 1996 жылы мемлекеттік қызметке керістім. Салық инспекциясында қарапайым маманнан бастап, бөлім басшысы, Салық басқармасы басшысының орынбасары қызметтерін атқардым. Халыққа қызмет көрсету орталығының жетекшісі, Үшқайық ауылдық округінің әкімі болдым. Қала әкімінің орынбасары, кеңесшісі, аппарат басшысы қызметтерін де абыроймен атқардым. Партия таңдау жасап, шешім қабылдар болса екінші рет депутаттыққа кандидатурамды ұсынуға қарсы емеспін. Тағы да сайланып жатсам, ел игілігі жолында қызмет етуді жалғастыратын боламын.
Майшай Әбенова атындағы жалпы орта мектебіне Социалистік Еңбек ерінің ескерткішін жеке қаржы есебімнен жасатып бердім. Өмірі өнеге боларлық жанға көше мен мектептің атауы берілуі тегін емес. Мұны жастарымыз ескеріп, аңыз адамды нағыз еңбекқорлықтың үлгісі ретінде көрсе деймін.
– Қызметте халық қалаулысы, ал отбасында қандай әкесіз, жанұялық өміріңіз жайында айтып өтсеңіз?
– Жұбайым Жанармен бірге екі ұлымызды тәрбиелеп отырмыз. Жалғас пен Дәулетияр есімді ізбасарларым көзімнің ағы мен қарасы. Перзент үшін әкелік мектептің орны ерекше, ұлдарыма әрқашан әділ болыңдар деп отырамын. Барлық бала әке мен ананың жылы алақанын, бақытты балалықтың дәмін сезіне білуі керек. Оған жағдай жасалса, ата-анасының атын шығаратын текті ұрпақ қалыптасатыны анық. Қос қанатымның, отбасымның амандығын Тәңірден тілеймін.
– Өмірлік ұстанымыңыз қандай?
Ұстанымым – жақсылық жасау. Туған еліме, халқыма аз да болсын жақсылығым тисе, одан артық бақыт жоқ секілді. Мақсатым – еліме аянбай қызмет ету. Еліміздің тыныштығы, әрбір жанұяның амандығы баянды болғай. Бейбіт күндегі ұрпақтар сабақтастығы жалғаса берсін. Өмірдің басты құндылығы осы емес пе?!
– Жеке тұлға ретінде сіздің пікіріңізше біздің қоғамға дәл қәзір нендей нәрсе жетіспейді деп ойлайсыз?
– Қоғамға дәл қазір діңгек боларлықтай идеология жетіспейді деп ойлаймын. Меніңше, бүкіл саяси күштерді, саяси құрылымдарды, мемлекеттік бағдарламаларды бір идеяның айналасына жұмылдыру керек. Айтылған ой – Елбасының «Рухани жаңғыру» мақаласында қамтылған. Ұлттық құндылықтарды жаңғыртуды көздейтін тұжырым атап айтылып тұрғандай, рухтың жаңғыруын ұлттық болмыспен байланыстырып қарастырған. Сонымен қатар, Тұңғыш Президентіміз Н. Назарбаевтың «Ұлы даланың жеті қыры» мақаласы Тәуелсіз мемлекетіміздің тарих толқынында алар орнын айқындап берді. Біз тектілігімізбен қашан да мақтануға тиіспіз.
– Отбасылық кәсібіңіз жайында естідік, толығырақ айтып өтсеңіз?
– Жұбайым Жанар Тәтібаева мен серіктесі Мадина Әкешеева «Ертегілер әлемі» аталатын балабақшаның құрылтайшылары. Бірнеше жыл бұрын 200 орынға лайықталған балалар орталығының бүгінде жұмысы жүйелі. Жуырда ғана осындай атаумен тағы да 250 орынға лайықталған балабақша салып, пайдалануға бердік. Жоғарыда айтқанымдай, серіктестік аясында салынған отбасылық кәсібімізді дөңгелетіп отырмыз. Балабақша заманауи талаптарға сай жабдықталған. Бүлдіршіндердің балалық қуанышын осылай еселеп отырған жайымыз бар.
– Әңгімеңізге рахмет, жұмысыңызға сәттілік тілеймін!
Нұртас КЕҢЕСБЕКОВ.
«Түркістан».