Жақында түркістандық ұстаз Гүлфариза Сыздықова Нұр-Сұлтан қаласындағы «Түркі әлемінің үздік студенті-2021» атанды. «BILIM -ORKENIETI» Ұлттық инновациялық ғылыми –зерттеу орталығының директоры Ә. Сатылғанов Гүлфаризаның ұстазы Әлия Мәлікқызы Нысанбаеваға «Алғыс хат» жолдап, онда «Сіздің шәкіртіңіз Президент Қасым –Жомарт Тоқаевтың «Тәуелсіздік бәрінен қымбат» атты бағдарламалық мақаласын оқушылар арасында кеңінен насихаттап, «Түркі әлемінің үздік студенті-2021» атанды. Еліміздің білім және ғылым саласын дамытуға қосқан елеулі еңбегіңіз үшін Сізге мың алғыс» деп жазса, ата –анасы Жамбыл Мәлікұлы Сыздықов пен Оразкүл Өтеуліқызы Бекжановаға: «Ата-анаға баласының жеткен жетістігін көргеннен артық бақыт болмайды. Болашақта балаңыз Қазақстан республикасының дамуына өзіндік үлес қосатын азаматша болатынына сеніміміз мол! Сіздерге мың да бір алғыс!» деп жазады.
Гүлфариза Жамбылқызы Сыздықова 1994 жылы 28 шілдеде дүниеге келген. 2013 жылы Түркістан қаласындағы Ғани Мұратбаев мектебін бітірген. Сол мектепте оқып жүріп, ақын, жазушы, айтыскер Қаныбек Сарыбаев туралы ғылыми жоба жазып, жеңімпаз атанды. Жол тартып, Нұр-Сұлтан қаласындағы Еуразия университетіне оқуға түсіп жақсы аяқтап, «Дипломмен ауылға» бағдарламасымен елге келді. Бұл жерде конкурсқа түсіп, Сарыағаш ауданында мемлекеттік қызметті екі жыл атқарды. Міне, биыл Ясауи атындағы қазақ-түрік университетінің магистратурасын қызыл дипломмен бітірді.
Гүлфариза өнегелі отбасынан шыққан. Әкесі Жамбыл Сыздықов мал шаруашылығында зоттехник болып қызмет атқарды. Анасы Оразкүл Бекжанова Түркістандағы педагогикалық училищені бітіріп, Қызылорда қаласындағы Гоголь атындағы жоғарғы оқу орнын бітірген. Қазақ тілі әдебиеті маманы. 40 жыл табан аудармай мұғалімдік қызмет атқарды. Аудандық, облыстық газеттерге мақалалары үзбей жарияланып тұрды. Шиелі ауданында Жадыра Тасмағамбетова туралы кітабы жарық көрді. КСРО журналистер одағының мүшесі. Өмірінде шаршауды білмейтін зерек маман конкурсқа қатысып, Қызылорда қаласындағы «Темір жол» техникумының қазақ тілі, әдебиеті пәнінің мұғалімі болып қызмет атқарды. Зейнеткерлікке сол жерден шықты. Қазір бақытты әженің тоғыз немересі бар.
Міне, анасының ақ сүтін еміп, нәр алған Гүлфариза жақында отбасын құрып, бақытты өмір сүруде. Жары Нұркелді Қарабалаев белгілі компанияда заңгер болып қызмет етеді. Гүлфаризаның атасы Төрекелді Қарабалаев та жедел жәрдемнің жүргізушісі болып жұмыс істеді. Балтакөл ауылының сыйлы азаматы. Елағасы атанды. Гүлфаризаның енесі Гүлайым Көшербаева медбике. Ақ халатты абзал жан ауылдастарының шынайы жанашыры болғандықтан тұрғындардың үлкені де, кішісі қадір тұтады.
Гүлфариза көп балалы отбасынан шыққандықтан кішіпейілдікті, білім-ғылымға құштарлықты өміріне арқау еткен. Гүлфариза Жамбылқызы келешекте үлкен белестерден көріне білетін жауапты маман.