Қозоқ телевидениесининг дарғаси, журналист Бейсен Қуранбек ҳақидаги эсдаликлар китоби тақдимоти Туркистон шаҳрида ўтди.
Ер жаннати Жетису минтақасидан туркий дунё бешиги Туркистон шаҳрига келган “Бизнинг Бейсен” китоби барча кутубхоналар тўридан жой олади.
Тўпламда машҳур эл оғаларининг эсдаликлари, замондошларининг фикр-мулоҳазалари, оқинларнинг бағишловлари, оддий томошабинларнинг соғинчлари жамланган.
Оддий ва камтаринлиги билан кўпчиликнинг ёдида қолган жамоат фахрийсига бағишланган ижод маҳсулининг тақдимотида унинг Туркистон вилоятидаги ҳамкасб, дўст ва замондошлари иштирок этдилар.
Аҳмад Яссавий номидаги халқаро қозоқ-турк университетининг илмий кутубхонасида ўтган маънавий тадбирда сўзга чиққан Бейсен Қуранбекнинг курсдоши, ҚР Журналистлар уюшмасининг Туркистон вилоят филиали раиси Ғалимжан Елшибай Яссавий номидаги халқаро қозоқ-турк университети журналистика кафедрасининг 3 нафар талабасига Бейсен Қуранбек номидаги стипендия тайинланишини маълум қилди.
Учрашув сўнгида “Бизнинг Бейсен” эсдалик китоби университет кутубхонаси ҳамда журналистика факультетига туҳфа қилинди.
Вилоят ҳокимининг матбуот хизмати.