Газетанинг дастлабки сони 1930 йили 4 октябрда нашр қилинган. Маънавий пойтахтимиз Туркистон шаҳрининг бунёдкорлик ишларга тўлуғ шажарали тарихини ёритишда нашрнинг хизматлари кўп. Элимиз бошидан кечирган тараққиёт йўллари билан Туркистон тарихининг ёрқин ифодаси ушбу нашр саҳифаларида мангуликка муҳрланганлиги биз учун мартаба, келаси авлодга ибрат. Қушнинг қўш қанотидай бўлган нашрнинг ўзбекча нусхаси 1956 йилдан буён чоп этилади. Доимо тўғриликни айта олган нашр не бир зарбдор воқеалар, мунозарали вазиятлар, ёрқин кунлар кўзгусига айланганлиги яширин эмас. Бу нашрда қозоқ халқининг атоқли қалам соҳибларининг хизмати, қолдирган изи бор.
Тажрибали журналист, шаҳримизга таниқли бўлган Малик Даулетов етакчилигида хизмат қилаётган барча ходимларнинг газетхонлар ахборот ва маънавият эҳтиёжини ўташ йўлидаги заҳматли меҳнатлари кўз ўнгимизда. Ижодий жамоадан ҳали ҳам кўп янгиликлар кутадиганимиз бор. Кўплаб шогирдлар тарбиялаган, қаноти билан қаламини чархлаб чиқарган «Түркістан» газетасининг келажаги янада порлоқ бўлишига ишончимиз комил. Нашр ахборот-тарғиботларни жадал, ҳаққоний юритиши туфайли эл ичида сиёсий барқарорлик сақланишига муносиб ҳисса қўшиб келади. Эндиликда 90 йиллик довонни эгаллаган нашр жамоасига меҳнатда зафар, ижодий равнақ тилайман. Мустақил элимизнинг ёрқин ишлари кўзгусига айланган газетанинг қутлуғ тўйи муборак бўлсин.
Жарилқасин АЗИРЕТБЕРГЕНОВ,
Туркистон вилоят оқсоқоллар ҳайъати раиси.