Газетамизнинг доимий фаол жамоатчи обуначиси, «Улес» хайрия жамоат жамғармаси раиси Райимжон Қўчқоров ташкилотчилигида вилоят марказида тўхтовсиз хайрия – мурувват тадбирлари ўтказилмоқда.
Ҳайит байрамига ҳамда Ғалабанинг 75 йиллиги шодиёнаси шарафига Р.Қўчқоров Туркистондаги 101 кам таъминланган, кўп болали оилаларга озиқ-овқат маҳсулотлари пакетини ҳадя этди. Бир неча миллион тенгелик ушбу хайрия ҳадяларини олган турли миллат – қозоқ, ўзбек, татар миллати вакиллари бўлган онахонлардан – беш фарзандли Салтанат Асанова, меҳнат фахрийси Замира Қозоқбоева, ҳамда Элвира Азимовалар «Улес» жамғармасига, шу жамғармага ёрдам бераётган тадбиркорларга, барча ташкилотчиларга ҳамда шахсан Р.Қўчқоровга самимий миннатдорчиликларини изҳор этдилар.
– Боқувчисиз қолган оилада болаларни тарбиялашдек осон бўлмаган ишни уддалаб келаётган онахонларга раҳмат, яхшилик кўриб ўсган фарзандлар келажакда юртига, элига яхшилик қилиш мақсади шаклланган муқим фуқаро бўлиб етишади,-деб ишонамиз. Э.Азимованинг яшаш шароити ўта оғир, уйи ночор ахволда. Шу жиҳатларни эътиборга олиб яқин келажакда шу оилага янги бошпана қуриб бериш ниятимиз бор,-деди Р.Қўчқоров. Кекса ёшдаги нуроний отахон Мирзахон Ибрагимов тиловат қилиб муҳтожларга мурувват ёрдам кўрсатаётган тадбиркорларга сиҳат-саломатлик, омад-саодат тилаб дуо қилди. Ижобат бўлсин.
Р.МАДАЛИЕВ.
Суратда: хайрия тадбири чоғида.