Улуғ Ватан урушига иштирок этган уруш фахрийлари орасида Туркистон шаҳри бўйича атиги 4 нафари қолибди. Ғалаба йўлида қийин-қистов кунларни бошдан кечирган қаҳрамонларимизнинг сафи кун сайин камайиб бораётгани дилимизни хижил этаётгани яширин эмас. Нима бўлганда ҳам эли учун жанггоҳларда жанг қилган қаҳрамонларимиз эл ёдида мангу сақланади.
Ғалабанинг 75 йиллик байрами муносабати билан маҳаллий бюджетдан Туркистон шаҳри бўйича умумий сони 977 одамга маблағ берилди. Жанг майдони ва суронли уруш йилларида Ватан учун ўтга тушган фуқароларга қўллов қуйидаги рўйхат бўйича амалга ошди:
* Улуғ Ватан уруши иштирокчилари ва ногиронлари рўйхатига кўра: 4 фахрийга 1 млн. тенгедан;
* Улуғ Ватан уруши иштирокчисига тенглаштирилган 288 одамга 55560 тенгедан;
* Урушда вафот этган жангчилар рафиқалари рўйхатига кўра: 24 одамга 30 минг тенгедан;
* 661 фронт орти меҳнаткашларига 30 минг тенгедан маблағ ажратилди.
Жорий йили Улуғ Ватан уруши Ғалабасига 75 йил тўлаяпти. Фахрийларимиз уруш даласида Ватани, келажак авлоди, кенг бепоён даласи учун қўрқиш деган ҳис-туйғусини юрагидан юлиб олиб ташлаган. Бу уруш халқимиз бошига тушган энг оғир кунлар эди. Суронли урушга 1,5 миллион қозоғистонлик иштирок этган.
Шулардан бири мақоламиз қаҳрамони УВУ фахрийси Фозил Азимов. Фозил Азимов 1922 йили 15 ноябрда дунёга келган. Ватанни ҳимоя қилишга 1941 йилнинг 21 июнида Туркистон ҳарбий комиссариатидан отланган. Сталингард яқинида душман билан курашиб, Польшани, Руминияни, Венгрияни, Австрияни ва Чехословакияни озод этишга иштирок этган.
Уруш фахрийси І-ІІ даражали “Улуғ Ватан уруши”, “Қизил Юлдуз” орденлари, “Жанговарлик мардлиги учун”, “Сталинградни ҳимоя қилгани учун” ва яна бошқа 18 медал билан тақдирланган. Ғалабадан кейин ҳарбий хизматда бўлган у истеъфодаги полковник.
Уруш ҳеч кимга бахт келтирмаган. Ёдимизга нобуд бўлган аскарлар, бева қолган оналар, етим қолган болалар. Барчасининг кўксини ўққа тутиши замирида сўзсиз Ватани ва бугунги авлод тақдири бор эди. Ниҳоят орзулар ушалиб, тинч ва фаровон ҳаёт кечириб, хайрли тонг отганига ҳам 75 йил бўлди.
Ф.Азимов урушдан кейинги осуда ҳаётда 33 йил давомида ҳарбий хизматда бўлган. Уруш фахрийсининг таъкидлашича, ҳужжатида туғилган йили 1922 йили бўлиб ёзилгани билан 1920 йили дунёга келган экан. Демак, бугунда отахон 100 ёш билан юзлашди. Шу кунлари Фозил ота 4 қиз, 1 ўғилдан 10 невара, 13 эвара қучган бахтиёр инсон. Авлодлари ичида Фозил отахоннинг йўлини танлаган невараси Саид Толипов. У бугунда Аягўз шаҳрида ҳарбий хизматда фаолият юритмоқда.
Бизнинг обод ва озод юртда фаровон турмуш кечиришимиз жанг майдонида ўзини қурбон этган фахрийларимиз туфайлидир. Шунинг учун ҳам уларга қандай ҳурмат-эътибор кўрсатсак ҳам ярашади. Ўтмиш тарихимизнинг тирик гувоҳи, аср умр кечган кекса жангчи ҳали бардам-бақувват, тетик. Бугунги авлод қайғу-ҳасрат кўрмаса деб тилайди. Мустақил юртимизни гуллаб-яшнатаверинглар дейди нуроний отахон.
Шинар АДИЛХАН қизи.