Республика илмий лойиҳалар танловида Туркистон вилояти ўқувчилари кучли учликдан жой эгаллади. Билимлар беллашувида вилоятимиздан 46 ўқувчи қатнашиб, 22 нафари совриндор бўлди. Алматилик ўқувчилар биринчи, павлодарликлар эса иккинчи ўринни қўлга киритдилар.
Умумий таълим фанлари бўйича республика илмий лойиҳалар танлови Алмати шаҳридаги Ал-Форобий номли Қозоқ Миллий университетида минг нафарга яқин ўқувчи иштирокида ўтди.
Ёш иқтидор эгаларининг билими тарозига солинган мусобақада Туркистон вилояти ўқувчилари 3та олтин, 7та кумуш, 12та бронза медалга эгалик қилишди. Илмий лойиҳа якуни бўйича Жетисай туманидаги “Дарын” ихтисослаштирилган мактаб-интернатининг 11-синф ўқувчилари – Бўлат Маханбетов ва Даниял Турсимурат ҳамда Сариоғоч туманидаги 4-сонли ихтисослаштирилган мактаб-интернатнинг 10-синф ўқувчиси Бағила Анарбек олтин медаль соҳиблари бўлишди.
Кумуш медалларни Кентов шаҳридаги ихтисослаштирилган “Дарын” мактаб-интернати тарбияланувчилари ютиб олишди. Шунингдек, Кентов шаҳридаги “Чўрноқ” умумий ўрта мактаби, Қазиғурт туманидан ихтисослаштирилган физика-математика мактаб-интернати ва Туркистон шаҳридаги Н.Ўнгдасинов номли ихтисослаштирилган мактаб-интернат ўқувчилари бронза медали билан тақдирланди.
Туркистон вилояти ҳокимининг матбуот хизмати.