Танирбергенов Даурен Рахимович
ӨМІРБАЯНЫ
Танирбергенов Даурен Рахимович 1988 жылы 26 маусымда Түркістан қаласында дүниеге келген. Қазақстан Республикасының азаматы. Ұлты – қазақ. Білімі – жоғары. 1994 жылы Түркістан қаласындағы №5 Ғ.Мұратбаев атындағы орта мектептің бірінші сыныбына қабылданып, аталған білім ордасын 2005 жылы тәмамдаған. Сол жылы Қ.А.Ясауи атындағы Халықаралық қазақ-түрік университетіне оқуға түсіп, 2009 жылы «Мемлекеттік және жергілікті басқару» мамандығы бойынша мемлекеттік басқару бакалавры дәрежесін алған.
2010 жылы Шымкент университетіне оқуға түсіп, 2012 жылы «Құқықтану» мамандығы бойынша бакалавр дәрежесін иеленген.
Еңбек жолын 2008 жылы «Рахим и К-1» ЖШС-нің директоры қызметінен бастаған. Аталған мекемені 2010 жылға дейін басқарған.
2010-2011 жылы Түркістан қаласы әкімі аппаратының ұйымдастыру-бақылау және кадрлық жұмыс бөлімінің бас маманы қызметін атқарған.
2011–2012 жылдары Түркістан қаласы әкімі аппаратының әлеуметтік реформалар мониторингі бөлімінің меңгерушісі болып қызмет еткен.
2012–2013 жылдары Түркістан қаласы әкімінің кеңесшісі лауазымын атқарған.
2013–2017 жылдары Түркістан қаласы әкімінің орынбасары қызметінде болып, жергілікті мемлекеттік басқару жүйесінде тәжірибе жинақтаған.
2017–2024 жылдары Түркістан облысының дене шынықтыру және спорт басқармасына қарасты «Түркістан облыстық Ә.Нұрмаханов атындағы олимпиада резервінің мамандандырылған балалар-жасөспірімдер спорт мектебі» мемлекеттік коммуналдық қазыналық кәсіпорнының директоры қызметін атқарған.
2024 жылы аталған спорт мектебі коммуналдық мемлекеттік мекеме болып қайта құрылуына байланысты, 2024–2026 жылдары «Түркістан облыстық Ә.Нұрмаханов атындағы олимпиада резервінің мамандандырылған балалар мен жасөспірімдер спорт мектебі» коммуналдық мемлекеттік мекемесінің директоры қызметін жалғастырған.
2026 жылдың сәуір айынан бастап бүгінге дейін «Олимпиадалық емес және ұлттық спорт түрлері бойынша жоғарғы спорт шеберлігі мектебі» КММ директоры қызметін атқарып келеді. Еңбек жолында кәсіпкерлік, мемлекеттік басқару, жергілікті атқарушы билік және дене шынықтыру мен спорт салаларында басшылық қызметтер атқарып, мол тәжірибе жинақтаған.
Отбасылы.
САЙЛАУАЛДЫ БАҒДАРЛАМАСЫ
Құрметті түркістандықтар!
Еліміз тәуелсіздік алғаннан бері демократиялық даму жолына түсіп, мемлекетіміздің басқару жүйесінде жаңа дәуір басталды. Алдағы 29 қараша күні өтетін қалалық мәслихат сайлауы – еліміздің саяси өміріндегі үлкен белес. Бұл тек сайлау ғана емес, халықтың болашағына қатысты тағдырлы таңдау. «Әділет» партиясы сенім білдіріп, мені Түркістан қалалық мәслихат депутаттығына кандидат ретінде ұсынып отыр. Бұл – мен үшін зор мәртебе, үлкен жауапкершілік әрі халқымыздың маған артқан сенімі деп білемін. Мен өз тәжірибемді киелі шаһар Түркістанның дамуына жұмсауға дайынмын. Түркістан – рухани астана ғана емес, экономикалық тұрғыдан әлеуеті мол қала. Оның өркендеуі – әрбір тұрғынның еңбегіне, ынтымағына және халық пен билік арасындағы берік байланысқа тікелей қатысты.
Мемлекет басшысының жүйелі саясатының негізінде халықтың әл-ауқатын жақсартуға және мемлекеттік басқаруды әділ етуге бағытталған маңызды қадамдар жасалуда.
Осы саясат негізінде №10 округ аумағындағы тұрғындардың өзекті мәселелерін шешуге ықпал ету, тұрмыс сапасын арттыру және мемлекеттік қызметтердің қол жетімділігін арттыру мақсатында төмендегі қадамдардан тұратын жергілікті жұмыс жоспарын ұсынамын.
Менің сайлауалды бағдарламамның басым бағыттары:
1. ЖОЛ ЖӘНЕ ИНФРАҚҰРЫЛЫМ
Асфальт төселмеген көшелерді асфальттау.
Жаяу жүргіншілер жолдарын салу.
Көшелерді жарықтандыру.
2. КӘРІЗ ЖҮЙЕСІ
Кәріз жүйесі жоқ аумақтарға желі тарту.
Кәріз мәселелерін шешуге ықпал ету.
3. СПОРТ ЖӘНЕ ДЕНСАУЛЫҚ
Жаңа спорт алаңдарын салу.
Футбол, баскетбол және волейбол алаңдарын көбейту.
Ашық жаттығу алаңдарын орнату.
Балалар мен жастарға арналған спорт секцияларын дамыту.
4. БАЛАЛАР ЖӘНЕ ЖАСТАР
Тегін және қолжетімді үйірмелер ашу.
5. ҚОҒАМДЫҚ ҚАУІПСІЗДІК
Көшелер мен аулаларға бейнебақылау орнату.
Қоғамдық орындардағы тәртіпті бақылау.
6. ҚОҒАМДЫҚ КӨЛІК
Автобус бағыттарын көбейту мәселесін көтеру.
Қоғамдық көліктің жүру жиілігін арттыру.
Жабық аялдамалар орнату.
Автобус қатынасын тұрғындарға қолайлы ету.
Қадірлі ағайын!
Алдағы сайлау – біздің ортақ болашағымызды айқындайтын маңызды қадам. Бұл тек дауыс беру рәсімі ғана емес, әрбір азаматтың өз қаласының тағдырына араласуы, өз үнін білдіруі. Әрбір дауыс – сенімнің символы, әрбір таңдау – Түркістанның ертеңіне қосылған үлес. Мен үшін Сіздердің сенімдеріңіз – ең асыл аманат, ар-ұжданға жүктелген қасиетті борыш.
Менің бар арман-мақсатым – қасиетті қаламызды көркейтіп, халқының тұрмысын жақсарту. Жаңа жұмыс орындарын ашу, кәсіпкерлікті дамыту, әлеуметтік қолдауды күшейту, жастарға білім мен мүмкіндік беру. Менің сайлауалды бағдарламам мен үшін құнды құжат, болашақта атқаруға ниеттенген нақты іс-әрекетім. Мен Түркістанды тек рухани астана емес, экономикалық қуатты, әлеуметтік әділдігі жоғары, мүмкіндігі мол шаһарға айналдыруға күш саламын. Бұл жолда халықпен бірге болып, әрбір ұсынысты тыңдап, елдік мүдде үшін адал қызмет етуге дайынмын.
Түркістанның тарихы қаншалықты терең болса, келешегіне артылар үміт те соншалықты зор. Сол үміттің ақталуы үшін жүйелі еңбек, берік жауапкершілік және ортақ мүддеге негізделген ынтымақ қажет. Туған жерге деген сүйіспеншілік – құр сөзбен емес, адал еңбекпен дәлелденетін қасиет. Ал елге қызмет ету – уақытша міндет емес, өмірлік жауапкершілік. Сол сенімге лайық болу үшін ашықтықты, әділдікті және адал еңбекті басты ұстаным ету қажет деп білемін. Біздің алдымызда тұрған мақсат айқын, міндет ортақ. Ол – тарихы тағылымға толы Түркістанның бүгінгі жетістіктерін еселеп, болашаққа нық қадам басуына үлес қосу. Осы жолда ынтымағымызды арттырып, ортақ мүдде төңірегінде топтасуымыз қажет. Себебі бірлігі бекем елдің болашағы баянды, тірлігі тату жұрттың мерейі әрдайым үстем.
Біз біріксек – алынбайтын асу жоқ, бір-бірімізді қолдап әрекет етсек – бағынбайтын белес жоқ. Татулығымыз – тірегіміз, бірлігіміз – берекеміз. Сондықтан, Сіздерді алдағы сайлауда белсенді болуға шақырамын. Түркістанның өркендеуі – біздің ортақ мақсатымыз, ортақ арманымыз. Сіздердің сенімдеріңіз маған күш береді, жігер сыйлайды. Қаламыздың игілігі үшін аянбай еңбек етемін.