Қазақстан Республикасы Парламент Мәжілісінің және «AMANAT» партиясының Төрағасы Ерлан Жақанұлы Қошанов 2025 жылды – Бастауыш партия ұйымдарының жылы деп белгілеп, партиямыз барлық игі істердің алғы шебінде жүруі тиіс деген талап қойды. Осы міндет шеңберінде «AMANAT» партиясы Түркістан облыстық филиалы өңіріміздегі 242 бастауыш партия ұйымдарының кәсіби дайындығын шыңдауда, оларды партия айқындаған құндылықтар аясына біріктіруде оқу семинарларын өткізу үрдісін енгізуді қолға алды.
Осы мақсаттағы алғашқы семинар Сайрам ауданының Қарамұрт ауылында өтіп, оған Бәйдібек, Ордабасы, Сайрам, Төлеби, Түлкібас ауданындағы бастауыш ұйымдардың жетекшілері қатысқан болатын. Осы мазмұндағы іс-шара бүгін Түркістан қаласында жалғасын тауып, оған Түркістан, Кентау, Арыс қалаларындағы, Созақ, Сауран, Отырар аудандарындағы 85 бастауыш партия ұйымдарының төрағалары қатысты. Семинарға қатысушылар үшін Түркістан қаласында партияның ықпал етуімен салынған нысандардың таныстырылымдары жүргізіліп, облыс орталығында қызмет ететін үлгілі бастауыш ұйымдардың жұмысы туралы ақпараттар берілді.
Семинар қатысушылары үшін Түркістан қаласын аралайтын автобус дайындалып, аймақтардан келген аманаттық өкілдер жаңарған Түркістанның келбетімен жақыннан танысты. Осы сапарда «AMANAT» партиясының бастауыш ұйымдарының жетекшілері партияның Сайлауалды бағдарламасын іске асыру жөніндегі Жол картасында Түркістан қаласы бойынша партиялық бақылауда болған маңызды нысан – №32 мектептің тыныс-тіршілігімен танысып, аралап көрді. Мемлекет басшысының «Жайлы мектеп» Ұлттық жобасы шеңберінде салынған мектепте 4 спорт залы қарастырылған, жасанды интеллект сыныптары жабдықталған. Балалардың жеке шығармашылық қабілеттерін шыңдауда би залы, музыка сыныптары жасақталған. Акт залы, асхана бөлмелері де үздік технологиялық шешімдермен көркемделген. Бұл жұмыстардың барлығы партия өкілдерінің жіті қадағалауында болып, атқарылған.
Тарихи және рухани-мәдени айрықша мәртебесі бар Түркістан қаласында ел игілігіне пайдалануға берілген жаңа нысандардың бірі – ботаникалық бағы бар «Жастар» саябағы. Түркі дүниесіне ортақ қаланың жаңарған келбетін айшықтайтын саябақтың ажарына «AMANAT» партиясының мүшелері арнайы келіп, бағасын берді. Барлығы 10,5 гектарды алып жатқан аймақта ұзындығы 2 шақырымды құрайтын жүгіру жолы мен веложолақ қарастырылған. Ботаникалық бақта Жерорта теңізі, Латын Америкасы, Еуропа, Оңтүстік Шығыс Азия және тағы басқа аймақтарға тән 70-тен астам өсімдіктердің түрлері күтімге алынған. Мұнда пальма, фикус, тропикалық, шөл, субтропиктік, цитрус өсімдіктері баптауға алынып, қала мектептерінің биология сабақтарын тәжірибе жүзінде өткізуге жағдай жасалған. Саябақта құстар мен балықтардың алуан түрі күтімге алынған.
Жұмыс сапары барысында бастауыш партия ұйымдарының жетекшілері «Үздік бастауыш партия ұйымы» байқауының облыстық кезеңінің жеңімпазы болған «Түркістан» бастауыш ұйымының жұмысымен танысып, жұмыс тәжірибесін зерделеді, Қожа Ахмет Яссауи кесенесіне барып, бабалар рухына тағзым етті. Партияның Сайлауалды бағдарлдамасын іске асыру жөніндегі Жол картасында айқындалған Бекзат Саттарханов атындағы спорт кешенін салу партияның ерекше бақылауына алынған нысан болатын. Пайдалануға берілген обьектіде партияның естелік белгісі қойылып, оның ашылу салтанатына бастауыш партия ұйымдарының төрағалары қатысты.
Семинар жұмысы «Ұлы Дала елі» орталығында жалғасын тапты. Семинардың мән-маңызына тоқталған «AMANAT» партиясы Түркістан облыстық филиалының төрағасы, Түркістан облыстық мәслихатындағы партиялық фракцияның жетекшісі Алтынсары Үмбетәлиев бастауыш партия ұйымдары партия мүшелерімен тікелей байланыста болғандықтан, әрбір партия мүшесіне партияның мақсатын, егеменді еліміздің саяси өміріндегі рөлін түсіндіру аса маңызды екенін айтты.
«Партия мен халық арасындағы байланысты одан әрі жетілдіру бағытында бастауыш партия ұйымдарының белсенділігін арттырып, жұмысын жаңа деңгейге көтеру міндеттеліп отыр. Партия сенімін ақтау біздің қолымызда. Бастауыш партия ұйымдары – «AMANAT» партиясының негізгі күші», – деп атап өтті Алтынсары Дүйсенбекұлы.
Семинар жұмысына Түркістан қаласы әкімінің орынбасары Мекенхан Қырықбаев, Түркістан қалалық мәслихатындағы «AMANAT» партиясының фракциялық мүшелері қатысып, іс-шара қатысушыларына ізгі тілектерін жеткізді. Жиында партияның облыстық филиалына қарасты бастауыш партия ұйымдарының қызметін талдау, олардың жұмысын бағалау, сын-ескертпелер мен ұсыныстары бойынша партияның өңірлік филиалы атқарушы хатшысының орынбасары Полат Тұрсынбаев хабарлама жасады. Партияның облыстық филиалы саяси жұмыстар бөлімінің меңгерушісі Бекзат Билалов, қоғамдық қабылдау бөлмесінің меңгерушісі Манат Жадақова, жауапты консультант Жанкелді Дүйсенбаев хабарламалар жасап, Сайлауалды бағдарламаны іске асыру жөніндегі Жол картасының орындалуы, азаматтардан партияға түсіп жатқан арыз-шағымдар бойынша атқарылып жатқан жұмыстарды баяндады.
Іс-тәжірибесі жөнінде хабарлама жасаған Түркістан қаласы «Бірлік» бастауыш ұйымының жетекшісі Гүлмира Алдабергенова мен «Түркістан» бастауыш ұйымының төрағасы Аманжол Мәди партияның төменгі буын ұйымдарының қызметін жаңа деңгейге шығару жөніндегі ұсыныстарын ортаға салды.
Семинарда бастауыш ұйымдарымыз үшін әдістемелік нұсқамалар беріліп, аймақтарда партиялық жұмысты атқарудың басымдықтары, партиялық жобалардың бағыт-бағдары түсіндірілді, азаматтармен нақтылы жұмыс атқарудың өзекті мәселелері айтылды.