Түркістан музыкалық драма театры биылғы маусымды жаңа қойылыммен бастамақ. Көрермен асыға күткен жаңа маусымның шымылдығын Қазақстанның халық әртісі, композитор Шәмші Қалдаяқовтың өмірі мен шығармашылығына негізделген Байділдә Айдарбектің «Вальс королі» спектаклі ашады. Осыған орай, Түркістан музыкалық драма театрында баспасөз мәслихаты өтті. Жиынға театрдың көркемдік жетекшісі Шынар Омарова, спектаклдің қоюшы режиссері Карло Шакаллуга, театр әртістері және БАҚ өкілдері қатысты.
Айта кетейік, Түркістан музыкалық драма театры 2024 жылдың сәуір айында Қазақстан Жазушылар одағымен бірлесе отырып көрнекті композитор Шәмші Қалдаяқовтың өмірі мен шығармашылығына арналған республикалық драматургия байқауын жариялаған еді. Бәйгеге түскен шығармалар ішінен Байділдә Айдарбектің «Ән-ғұмыр» атты пьесасы жүлделі орынға ие болған еді. Қазақ ән өнерінің жарық жұлдызы Шәмшіге арналған шығарма атауы автор келісімімен «Вальс королі» боп өзгертілген.
Баспасөз мәслихатында мәлім болғандай, театрдың жаңадан құрылған музыкалық ансамблі мен хоры Шәмші Қалдаяқовтың үздік әндерін орындайды. Премьераға келген көрермендер Шәмші Қалдаяқов мұражайының экспонаттары мен ойнаған музыкалық аспаптарын тамашалап, ескерткіш суретке түсе алады. Спектакль кейіпкерлерін толығымен Түркістан музыкалық драма театрының төл актерлері ойнайды.
Басты ролдерде ойнайтындар: Данияс Нұрқабден, Қадыржан Төреханов, Али Марат, Сұлтан Мейірбек, Айя Дәрібаева, Аида Серікова, Темірлан Еркінғалиев, Сембай Нұрла, Мұзафар Ғалымжанұлы, Дінмұхаммед Алпысбек, Ақ-Сұлтан Әнуарбек, Мерей Құдайберген, Шерхан Саматұлы, Ұлан Әділбек, Шұғыла Жәнібекова, Болатбек Оспан, Ақбөпе Сабет, Инабат Абытхан, Айдана Аққали, Досымжан Арқабеков, Мейіржан Тұрсынов және тағы басқа Түркістан музыкалық драма театрының әртістері.
Сонымен қатар, бірегей өнер ордасы жыл сайын жаңа қойылымдарға шетелдік мамандарды тартуда. Аталған «Вальс королі» музыкалық драмалық спектаклін қоюға халықаралық деңгейдегі көптеген тәжірибелі мамандар атсалысуда. Мәселен, қойылымның сценографиясын қойған – Италияның «Architizer Prize and A.I.A Middle East» марапаттарының жеңімпазы «Gio Forma» студиясы, жарық жөніндегі суретшісі – Gaetano La Mela.
Естеріңізге сала кетейік, «Вальс королі» музыкалық драмалық спектаклінің премьерасы 2024 жылдың 4,5,6,7 қазан күндері сағат 19:00-де басталады.
Дәурен ТІЛЕУХАН.