«Пруст сауалнамасы» – әлемдегі ең танымал сауалнамалардың бірі. XIX ғасырдың соңында пайда болған «Пруст сауалнамасы» бүгінгі таңда бұқаралық ақпарат құралдарында жиі қолданылып келеді. Шарт бойынша қонақтар сауалнама сұрақтарына қысқа, нақты, шынайы жауап беруі қажет. Бұл сұрақтар өзіңді тануға, өзгенің қызығушылығы мен талғамын білуге, сонымен қатар, уақыт өте келе ойың мен көзқарастарыңның қалай өзгергенін бақылауға таптырмас құрал болары сөзсіз.
Төменде «Пруст сауалнамасының» қонағы, Қазақстан Композиторлар одағының мүшесі, Түркістан, Кентау қалаларының және Сауран ауданының құрметті азаматы, композитор, ұстаз, журналист Бекжігіт Сердәлінің сауалнамасын ұсынып отырмыз.
– Сіз үшін ең қатерлі нәрсе?
Қазақ тілінің күнделікті қолданыстан ажарап бара жатқандығы. Тек қана жастарға кінәламаймыз. Үлкен кісілердің өздері қазір өзге тілде сөйлеуге кетіп бара жатыр.
– Қай жерде өмір сүргіңіз келеді?
Мен Алматыда өмір сүргім келеді. Бала күнгі арманым еді.
– Қандай ерекше қабілетке ие болғыңыз келеді?
Флейта деген аспапта ойнағым келеді.
– Сіз үшін бақыт деген не?
Бақыт деген таза ауа жұтып, еркін-жүріп тұра алуың ғой. Одан асқан қандай бақыт керек?!
– Қандай қателіктерді кешіруге болады деп есептейсіз?
Адам өзінің өмірін сақтап қалу үшін не болмаса қайғыға душар болмас үшін бір өтірік айтатын болса оны кешіруге болады. Кітап ұрлаған жағдайда «Сіздің кітабыңызды мен рұқсатсыз алып едім» деп мойындар болса оны кешіруге болады.
– Егер сіз-сіз болмасаңыз онда кім болар едіңіз?
Дәрігер болар едім.
– Ең сүйікті әдеби кейіпкерлеріңіз?
Сәкен Жүнісовтың романындағы Ақан сері
– Шынайы өмірдегі сүйікті кейіпкеріңіз?
Димаш Құдайберген
– Басты кемшілігіңіз?
Кейде айтқан сөздеріме, жасаған іс-әрекеттеріме кейінірек өкініп қаламын.
– Үнемі есіңізде жүретін Абайдың бір сөзі?
Махаббатсыз дүние бос…
– Қазіргі адамдардың бойынан қандай қасиеттер жоғалып барады?
Адамдардың бір-біріне деген мейіріммен қарауы жоғалып барады.
– Біздің заманымыздың мықты ақыны, жазушысы кім?
Заманымыздың мықты жазушысы Дулат Исабеков, мықты ақыны торғайлық Саят Әбенов.
– Жиі айтатын қанатты сөзіңіз?
Сен де бір кірпіш дүниеге, кетігін тап та, бар қалан.
– Түркістандықтарға айтарыңыз?
Өздеріңізді қалаларыңызды таза ұстаңыздар. Сол қалада тұрып жатқан адамдарға құрметпен қараңыз. Тыс жерге шыққанда қалаңызды жамандамаңыз.
Дайындаған Ағайша АЛПЫСБАЕВА,
ХҚТУ-нің 4-курс студенті.