Түркістан қаласындағы Халықаралық туризм университетінің спорт сауықтыру кешенінде үстел теннисінен «Amanat cup» облыстық ашық турнирі өтті. «Иассы» копсорциумы мен Farabi school мекемесінің қолдауымен ұйымдастырылған сайыс Түркістан облысының 5 жылдығына орай өтіп, байрақты бәсекеде өңірдегі аудандармен қатар, Қырғызстан елінің және көршілес облыстардың ракеткашылары бақ сынады. Тартысты сайысқа барлығы 136 ер және 64 қыз бала тіркелген.
6 жас ерекшелігіне жіктелген сайыста 2005-2009 жылдары туылған бұрымдылар арасында Ахмадалиева Шахзода алтыннан алқа тақса, 2010-2012 жылғылар ішінен Ханиязова Мафтуни көш бастаған. Ал, 2013 жыл және одан төменгі дүниеге келгендерден Шымкенттік Камилжанова Шодина бас бәйгені қанжығаға байлады. Ұлдар арасындағы жас ерекшеліктерінде де 2005-2009 жылғылардың көшін бастап Түркістандық Төлебаев Самат жайғасса, 2010-2012 жылғылар ішінен Жұмағұл Марлен қарсылас шақ келтірмеді. 2013 жылы және одан төменгі жасөспірімдер арасындағы алтынды Жұмағұл Абай қоржынына салды.
Сонымен қатар, ересектер арасында 18-40 жас дәрежесінде Әкімәлі Бақдәулет жеңіс тұғырынан көрінсе, 41-59 жастағылар арасында Болат Бакутов алтыннан алқа тақты. 60 жастан жоғарғы жастағы әуесқойлар мен кәсіпқойлар көшін Ким Николай бастады. Жеңімпаздарға арнайы әзірлеген кубоктар, медальдар мен сыйақылар табысталды. 2 күнге созылған дүбірлі дода арқылы облыс абыройын республикалық турнирлерде қорғайтын үздіктерді анықтау көзделген. Өзгелерден оқ бойы озық болғандарды «АMANAT» партиясы Түркістан облыстық филиалының төрағасы Алтынсары Үмбетәлиев құттықтап:
– Құрметті жаттықтырушылар мен спортшылар! Сіздерге еліміздің даңқын шығаратын ұрпақ тәрбиелеу үшін, шеберліктеріңіз бен тәжірибелеріңізді жұмсай береді деп сенемін. Сондықтан, барлықтарыңызға әрбір игі істеріңіз бен бастамаларыңызға сәттілік серік болсын, отбасыларыңызға баянды бақыт пен бақ-береке орнасын дегім келеді. Сонымен қатар, бүгінгі турнирдің сәтті өтуіне үлес қосқан төрешілер мен бапкерлерге және қатысушыларға, сондай-ақ қолдаушыларға өз алғысымды білдіремін, – деді.
Дүбірлі доданың жабылу салтанатына қалалық мәслихат төрағасы Ғаппар Сәрсенбаев пен қалалық мәслихат депутаты Нұрсұлтан Жүсіпбаев та қатысып, сайыс жеңімпаздарын құттықтады.
Досхан ТӨЛЕГЕНОВ.