Жетісай ауданының әкімі Серік Үсенұлы Мамытов кезекті кездесуін Қарақай ауылдық округінде жалғастырды. Еркін форматта пікір алмасып, ұсыныстар тыңдалды. Жоспарлар талқыланды.
Аудан басшысының мәліметінше мамыр айында өткен кездесуде тұрғындарды толғандырып жүрген әлеуметтік және өзекті деген 11 мәселе, нақтырақ айтар болсақ, Қараөзек елді мекеніне қарасты Исақұлұлы көшесіне «Жетысай қызмет» мекемесі тарапынан жарық шамдар орнатып, іске қосу, Сатпаев ауылындағы ауыз су ұңғымасынан әр тоқсан сайын аудандық сараптама орталығы тарапынан су сынамасын алу арқылы жарамды-жарамсыздығын анықтау мәселелері өзінің оң шешімін тапса, округтің көркейту-көгалдандыру, санитарлық тазалау, әлеуметтік-экономикалық дамуына қатысты 9 мәселе бойынша арнайы жоспарлар бекітіліп, тиісті жұмыстар жүргізілуде.
Сонымен қатар, Ж.Ералиев, Мақталы, Қазыбек би және Қарақай ауылдық округтерінде жүзеге асырылып жатқан «Ауыл Аманаты» бағдарламасы аясында шаруаларды несиелендіру шаралары да қарқынды жүргізілуде.
Өсімдік, жылы жай, мал, құс, балық, түрлі сала бағытында жүзеге асырылуы көзделген бағдарлама негізінде Қарақай ауылдық округі бойынша жалпы суммасы 368,4 млн теңгені құрайтын 63 құжаттың 95,8 млн теңгені құрайтын 21 жобасы мақұлданып, қаржыландырылған.
Жалпы ұзындығы 1945 метрді құрайтын Еңбек елді мекеніндегі Жаңа құрылыс көшесіне орта жөндеу жұмыстары жүргізілуде.
Одан бөлек, кездесу барысында бірінші жарты жылдықта жалпы өңірлік өнім көлемі 33,5 млрд теңгеге жетсе, 1,8 млрд теңгенің құрылыс жұмыстары атқарылғанын айтты.
Ал, былтырғы жылы негізгі капиталға бағытталған инвестиция 15,1 млрд теңгеге жетсе, биылғы 6 айдың қорытындысымен 9,7 млрд теңге инвестиция тартылған. 6 айда өзіндік кірістер 2,5 млрд теңгені құраған.
Ашық ауа астында өткен кездесуден соң Серік Үсенұлы тұрғындарға жеке қабылдау өткізді. Мұң-мұқтаждарын тыңдап, тиісті мекемелерге тапсырмалар берді.