Түркістандық жас спортшылар үздіктер қатарынан көрінді. Алматы облысында гандбол спорт түрінен Ұлттық мектеп лигасында сынға түскен №16 Талғат Бигелдинов атындағы мектеп оқушыларынан құралған құрама қола жүлдемен оралды. Еліміздің түкпір-түкпірінен 13 команда қатысып, байрақты бәсекеде облыс абыройын арттырған жеткіншектердің бұл алғашқы жарысы. Балаларға бастапқы ойындарда тәжірибе жетіспегенін жасырмады команда жаттықтырушысы, мектептің дене шынықтыру пәнінің мұғалімі Пардабай Аметов.
Жарыс өте жоғары деңгейде өтті. Төрешілер әділ шешім қабылдады деуге болады. Ұйымдастырушылар да барлық жағынан қолдау көрсетті. 5 және 6 сынып оқушылары арасында өткен сайыста балаларымыз өздерінің мықтылықтарын дәлелдей алды. Жарысқа барып, келуімізге қолдау білдірген мектеп басшылығына және ата-аналарға алғыс айтамын,- деді жаттықтырушы.
Сайысқа аттанған балалардың аталған спорт түрімен айналысқанына бір жылға жуық уақыт болған. Команда капитаны Абзал Өтегенов жарыс арқасында жаңа достар, жаңа таныстар тапқанын, сонымен қатар, арман қала Алматының әсем жерлерін аралап, керемет әсер алғанын айтты. Жартылай финалда Алматы облысын жеңгенімізде сөзсіз бірінші орын алатын едік. Сәл ғана сәттілік жетіспей қалды. Бастысы бірліктің арқасында барлығына жетуге болатынын түсіндік. Келесі жылы алтыннан алқа тағу үшін барымызды саламыз. Жарысқа дайындаған жаттықтырушы ағайларымызға алғысымыз шексіз, – дейді жас спортшы.
Дүбірлі додада облыс абыройын асқақтатқан спортшыларды мектеп басшылығы, ата-аналар мен сыныптастары күтіп алды. Жас гандболшыларға арналып ән айтылып, арнау оқылды. Ата-аналар үздіктер қатарынан көрінгендерге ақ батасын беріп, алдағы сайыстарға сәттілік тіледі.
Д.ТАЛҒАТҰЛЫ.