Түркістан облысқа айналғалы бері жаңашылдыққа бет бұрды. Қала аумағында көптеген жаңа нысандар бой көтеріп, жемісті жұмыс атқарылып келеді. Солардың бірі – бірнеше жылдың ішінде ЮНЕСКО клубтарының қатарына еніп үлгерген «Оқушылар сарайы».
Бүгінде орталықта 6 бағыт бойынша 60-қа жуық үйірме түрі жұмысын жалғастыруда. Айта кетсек, 1200-ден астам 3 жастан 18 жасқа дейінгі балалар, студенттер мен ересектер қосымша білім алуда. Нақтырақ, мұнда барлық пәндер мен бірнеше шет тілі, IT-технология, спорт, зергерлік өнер, ағаш шебері, дәстүрлі ән және аспаптар бойынша және т.б. үйірмелер бар. Көпбалалы және атаулы әлеуметтік көмек алатын отбасылардың балалары үйірменің 60 түріне тегін қатысуға мүмкіндіктер қарастырылған. Осы және «Балалар жылында» атқарылған өзге де жұмыстар туралы мекеме директоры Индира Икапова Өңірлік коммуникация қызметі алаңында өткен баспасөз жиынында айтты.
Индира Сарқытқызының айтуынша, өткен жылы «Оқушылар сарайы» – ЮНЕСКО клубы мен бірнеше мекеме арасында өзара ынтымақтастық меморандумына қол қойылған. Ол келісімдер нәтижесіз де емес. Мәселен, Қ.А.Ясауи атындағы ХҚТУ, Халықаралық туризм және меймандостық университеті, М.Әуезов атындағы ОҚУ және Тұран-Астана университетімен өзара ынтымақтастық аясында былтыр «өнерлі жас», «бармақтар», «өлкетану», «хореография», «жас Дарын», «мәдени-тынығу жұмысы», «бейнелеу өнері», «сән, интерьер дизайны» және «өнеркәсіптік дизайн», «дизайн», «сәндік өнер» және «этнодизайн» бағыттары бойынша Республикалық «JAS TALANT» онлайн конкурсы өткізілген. Оған еліміздегі білім беру мекемелерінің бітіруші оқушылары мен бітіруші колледж студенттері қатысып, 4 Жоғарғы оқу орны бөлген 30 грантты сарапқа салған. Республикалық деңгейде өткізілген бұл жобаға қатысу бойынша 70-ке жуық өтініш түсіп, додаға түскен үміткерлердің 21-і грант иегері атанған.
– «Оқушылар сарайы» – ЮНЕСКО клубына қарасты тігін шеберханасындағы «Киім моделін жобалау» үйірмесінде ересектерге арналған «Ісмер ана» жобасы қолға алынды. Жобаның мақсаты – үйінде жұмыссыз отырған көпбалалы аналарға бос уақытын тиімді пайдалануға мүмкіндік жасау және қыз-келіншектердің қоғамдағы мәртебесін арттыру. Аталған курста толық білім алған аналар «Оқушылар сарайы» мен Түркістан облысының кәсіпкерлік палатасы арасындағы меморандум арқылы сертификат алып, өз кәсіптерін жалғастыра алады, – деді мекеме директоры.
Сондай-ақ, қазіргі таңда бұл жоба кеңінен қолдау тауып, өңірдегі аудан, қалаларда «Ісмер ана» жобасының филиалдарын ашу жоспарлануда. Ал “Qumyra” жобасы көпшіліктің сұранысына ие болып отыр. Онда сазбалшықтан құмыра жасау бойынша шеберлік сабағы жүргізіледі. Қала тұрғындары мен қонақтары осында құмыра жасап, суретке түсіп, сұранысты арттыруда.