Еліміздің саяси-экономикалық дамуының нақты жоспары Қасым-Жомарт Тоқаевтың Жолдауында көрініс тапты десек те болады. Сан жылдар бойы еңсесін тіктеп, батыл қадам жасап келе жатқан еліміз үшін бұл – тарихи-саяси мәні ерекше құжат. Мысалы Абай, Ұлытау, Жетісу облыстарының құрылуы халықтың толық көңілінен шығып, кең ауқымда қолдау тауып отыр. Сондай-ақ, Қасым-Жомарт Тоқаев «суперпрезиденттік» басқару формасынан күшті Парламенті бар президенттік формаға көшуді ұсынды.
Отыз жыл бойы елімізде қордаланған мәселелер тым көбейіп кетті. Әсіресе, азаматтар құқығын сақтамау, ел заңдарын өрескел бұзу фактілері халықаралық ұйымдардың сынына ұшырады, Қазақстан беделіне нұқсан келтірді. Осындай келеңсіз жайттарды тізе келіп Президент реформаларды неден бастау керек екенін атап өтті. Ел Президентінің әкімшілік-аймақтық мәселеге ден қойғаны, бұл Қазақстанның бүгінгі алмағайып кезеңдегі аумағын нығайтып, болашақ ұрпақтың қамын ойлаған бүкіл халық қолдайтын саяси-экономикалық өзгерістердің бірі деп айту керек. Осыған орай, кезінде жеке облыс болып шаңырақ көтерген Семей облысының Абай, Жезқазған облысының Ұлытау, Алматы облысының Жетісу және Алматы облысы болып қайта құрылуы, Қапшағайдың атын өзгертіп, Қонаев деп атауға ұсыныс жасауы біздің ұлтымыз үшін өте маңызды құптайтын қуанышты жағдай. Дәл қазіргі қиын-қыстау кезде осындай ауқымды мәселелердің бәрін жүзеге асыру үшін қаншама қаражат пен адами ресурс қажет екенін ұмытпайық. Президент айтқандай, Қазақстан – дара және жалғыз мекеніміз, оның да мүмкіндіктері шектеулі екенін есте сақтайық және оны алақанымызға салып мәңгілік асыл мұра болып қала беруіне баршамыз бір адамдай жұмылғанымыз абзал.
Президент Қасым-Жомарт Тоқаевтың бұл жолғы Жолдауын барша қазақстандық қоғам тағатсыздана күткені анық. Өйткені, Жолдаудың негізгі мазмұны саяси реформаларға қатысты болатын. Қаңтар дүрбелеңінен кейін дағдарып тұрған жұртшылық Президенттен Жаңа Қазақстанды қалыптастыруға бағытталған тың бастамалар күтті. Заман ағымы, уақыт тынысы бұдан да іргелі, әрі күрделі өзгерістерді талап етері сөзсіз. Ең бастысы, халықтың талап-тілегіне және азаматтық қоғамның даму қарқынына орай, дер кезінде оң өзгерістерге бет бұру. Бұл тұрғыдан алғанда Президент Қасым-Жомарт Кемелұлы Тоқаевтың Жолдауын Қазақстан қоғамын демократияландыру жолында жасалған тарихи қадамдардың бірі деп бағалауға тиіспіз. Мемлекет басшысының өз сөзімен айтқанда бұл Жолдаудың «арқалайтын жүгі бір жылмен шектелмейді, ауқымы кең, мазмұны да бөлек».
Қасым-Жомарт Кемелұлы Тоқаев қазіргідей алмағайып кезеңде алаң көңілде отырған отандастарымызға еліміз үшін дамудың жалғыз ғана жолы бар екенін айқындап берді. Ол – қоғамның әрбір мүшесі мемлекеттік саясатты қалыптастыруда тең құқыққа ие бола алатын демократия жолы. Ол жолға жету үшін Президенттің өзі айтқандай «жұртымызға, ең алдымен, ауызбіршілік керек. Ақыл мен сабыр, парасат пен ұстамдылық қажет».
Тәжібек МҰСАЕВ,
Түркістан қалалық мәслихат депутаты.