Түркістан қаласы «Балуан Шолақ» атындағы спорт кешенінде бокстан облыстық біріншілік сәтті аяқталды. Әр жылы дәстүрлі түрде өтетін былғары қолғап шеберлерінің сайысы ТМД халық шығармашылығы және мәдени мұра жылына орай КСРО-ның спорт шебері Пазылбеков Марат Мәдениетұлын еске алу мақсатында ұйымдастырылды.
2008-2009 жылы туған жасөспірімдер арасында өткізіліп отырған жарысқа облыстың аудандарынан 350-ге жуық спортшы 20 салмақ дәрежесінде бақ сынады. Мәренің соңына қарай 80+ салмақта өнер көрсеткен Түркістандық Ерасыл Бақытжанұлы көрерменнің көзайымы болды. 2008 жылғы туылған жас спортшы шаршы алаңда қарсыласын нокаутқа түсіріп, жанкүйерлердің ыстық ықыласына бөленді.
Алтын жұдырықты бәсекенің жеңімпазын анықтау 4 күнге жалғасып, спортшылар облыстық біріншіліктен аймақтық біріншілікке жолдама алды.
Қорытынды сөзде қаланың бас имамы Мухаммеджан Джумадуллаев Пазылбеков Марат Мәдениетұлын еске алып, спортшыларды жеңісімен құттықтап, алдағы қадамдарына сәттілік тіледі.