ҚазАқпарат- Түркістан облысында азық-түлік бағаларын тұрақтандыруға 1,5 млрд теңге жұмсалмақ деп хабарлайды ҚазАқпарат тілшісі.
Бұл туралы брифингте тұрақтандыру қоры департаментінің директоры Лаура Жанасбаева мәлімдеді. Қаржы тұрақтандыру қорына азық-түлік қорын сатып алуға және ірі сауда орындарын «Айналым схемасы» жобасымен қаржыландыруға бағытталатын болады. Бүгінгі таңда, тұрақтандыру қорында құны 320,9 млн теңгені құрайтын 3 мың тоннаға жуық тауар бар. Лаура Жанасбаеваның айтуынша, облыстағы өзге де аудандардағы сауда орындарына тұрақтандыру қорындағы арзандатылған тауарлар жеткізілуде. Ол тауарлардың келуі аудан әкімдігінің сұранысы бойынша жүзеге асады. Қазіргі кезде «Түркістан қаласы аумағында 13 әлеуметтік дүкен мен 5 сауда үйлерінде 18 азық-түлік тауарлары арзандатылған бағамен сатылуда. Мәселен, картоп пен сәбіз – 100 теңгеден, пияз – 70 теңге, тұз – 42 теңге, күріш – 265 теңге, макарон – 200 теңге, қант – 315 теңге, ұн – 150 теңге, күнбағыс майы – 720 теңге, қарақұмық – 480 теңге, жұмыртқа – 34 теңге, тауық еті – 870 теңге, қырыққабат – 110 теңге, әлеуметтік нан – 70 теңгеден сауданалануда. Бұдан басқа, Түркістан қаласында филиалы бар «Магнум» сауда желісімен ӘМАТ-қа сауда үстемесін 15%-дан 10%-ға дейін төмендету туралы келісім жасалды», – деді Тұрақтандыру қоры департаментінің директоры. Сондай-ақ, брифингке қатысқан облыстық кәсіпкерлік және сауда басқармасының басшысы Нұрбақыт Иманқұлов ӘМАТ бағалары күнделік қатаң бақылауда екендігін айтып, бұл мақсатта тиісті жұмыстар атқарылып жатқандығын жеткізді. Тауар бағаларын тұрақтандыру бойынша облыстық ауыл шаруашылығы басқармасының бөлім меңгерушісі Бақдәулет Тілеуов биылдың өзінде облыс орталығындағы «Экобазарда» азық-түлік тауарларының 9 жәрмеңкесі өткенін айтты. Айта кетерлігі, әр жұма күні Түркістан қаласындағы «Экобазарда» азық-түлік тауарлары жәрмеңкесінде тауарлар нарықтық бағадан арзандатылып сатылуда.