Түркістанда тұңғыш рет олимпиада резервін дайындайтын арнайы мектеп-лицейі ашылды. Жаратылыстану-математикалық бағытты қамтитын арнаулы білім ордасы 1-қыркүй-екте алғаш рет оқушыларды қабылдап алды. Алдағы уақытта таңдап алынған білікті ұстаздар оқушыларға тереңдетіп білім беретін болады.
Білім адамзаттың сарқылмас қазынасы. Ұлы суреткер жазушы М.Әуезов «Ұлт пен ұлтты, адам мен адамды теңестіретін нәрсе – білім» деп тегін айтпаған. Біз үнемі айтып жүретін, ойшылдық, көрегендік, адамгершілік, парасаттылық деген ұғымдардың бәрі де білімнен келеді. Тәрбиенің негізгі бастауы да – білімде. Сондықтан елімізде оқу орындары мен сапалы мектептерді көптеп бой көтеруі – ел болашағының сенімін одан әрі нығайта түспек.
Осы мақсатта жаңа оқу жылында түркістандық мектептердің қатары тағы да артты. Отырар мөлтек ауданында 900 орындық су жаңа №28 мектеп-лицейінің лентасы қиылып, оқушыларды қабылдау рәсімі өтті. Жаңадан бой көтерген білім ордасының ерекшелігі – жаратылыстану-математикалық бағытта олимпиада резервін дайындайды екен. Аталмыш мектептің ашылуына облыс әкімі Өмірзақ Шөкеев қатысып, ұстаздар мен оқушыларды «Білім күнімен» құттықтады.
– Еліміздің болашағы білімді жастардың қолында. Ендеше, осы жаңа мектептің табалдырығын алғаш аттағалы отырған сіздерді – үздік оқып, ел үмітін ақтап, еліміздің патриот азаматы болатындықтарыңызға сенемін. Қолдарыңызға алғаш алған «Әліппе» оқулықтарыңыз құтты болсын! Ел Тәуелсіздігінің 30 жылдығымен және бүгінгі жаңа оқу жылының басталуымен құттықтай отырып, зор денсаулық, мол жетістіктерге қол жеткізуді тілеймін – деді, Өмірзақ Естайұлы.
Сонымен қатар, облыс басшысы жаңа білім ордасын аралап, ұстаздардың еңбегіне сәттілік тіледі. Бұл мектеп-лицей дарынды оқушылардың үздік деңгейде білім алуына зор ықпал ететіні сөзсіз. Себебі мұнда заманауи пән кабинеттері қарастырылған. Жаңадан ашылған білім ордасының ұстаздары да оқушыларға тереңдетіп білім беретін білікті мамандар.
Айта кетейік, биыл жаңа оқу жылын Түркістан қаласындағы 33 мемлекеттік және 10 жекеменшік мектеп 45 248 оқушымен бастап отыр. Олардың ішінде 4 мыңнан астам оқушы алғаш рет мектеп табалдырығын аттап, қолдарына жаңа «Әліппені» ұстады.