2021 жылдың 1 шілдесінен бастап көне Түркістанның төл перзенті Давронжан Гаипов Алматыдағы Сулейман Демирель атындағы университеттің ректоры болып тағайындалды.
Давронжон Еркінұлы Түркістан қаласындағы Сабыр Рахимов атындағы орта мектепті үздік бітіріп, Қожа Ахмет Ясауи атындағы Халықаралық қазақ-түрік университеті ағылшын тілі факультетін, Алматыдағы Абылай хан атындағы ҚазХҚжӘТУ магистратурасын және Еуразиялық гуманитарлық институтының докторантурасын бітірген. Шет елдегі Кэмбридж университетінің педагогика факультетінде тағылымдамадан өткен, «Болашақ» бағдарламасының түлегі.
2009 жылдан бері Алматыдағы Сулейман Демирель атындағы университетте әртүрлі қызметтер атқарып, 2017 жылдан бері СДУ академиялық істер және ғылыми зерттеулер жөніндегі проректоры болды. Үйленген, төрт баласы бар.
Осынау қуанышты сәттер қарсаңында жалпы түркістандықтарды, ректордың ата-анасы жоғары дәрежедегі дәрігерлер Еркін және Зайтуна Гаиповтарды ұлдарының жоғарыдан көрініп, қаламыздың мәртебесін асқақтатуымен құттықтаймыз. Ұлы жазушы Мұхтар Әуезовтің «Осы күнгі біздің көп мақтанышымыздың ең ірісі – ғылым» дегендей, 40 жастағы ректор – Давронжанның алдағы жұмыстарына сәттілік тілейміз.