1 қазан – Халықаралық қарттар күні
Қоғамның ізгілігі – балалар мен қарттарға жасалған қамқорлықпен бағаланатыны бұлжымас ақиқат. Бұл тұрғыда еліміздегі қариялар мәселесіне тоқталар болсақ, қарттар мен мүгедектер, қорғаушысы жоқ кембағалдар жалпы зейнеткерлер жайы Елбасының халыққа арнаған Жолдауында назардан тыс қалған емес. Үлкендерге деген сый-құрметтің бір күннің аясында шектеліп қалмау керек. Өйткені, бүгінгі жас – ертеңгі қарт. Осы заңдылыққа бас иген қазақ қашаннан үлкенді сыйлауда жаңылмаған. Халқымыздың «Үлкенге – құрмет, кішіге – ізет» немесе «Атаңа не қылсаң, алдыңа сол келеді» секілді пәлсапалық мәні зор қағидаларының жасқа да, жасамысқа да бағдаршам іспеттес болуы соның жарқын айғағы. Аузы дуалы ақсақалы бар ел жастарының қашанда жөнсіздік пен жолсыздыққа бой ұрмасы хақ. Бұған бала тәрбиесіне ерекше ден қойған бабаларымыздың «атаңнан бота қалмасын, бата қалсын», «түбіріне қарай бұтағы, тегіне қарай ұрпағы» деген қанатты сөздері дәлел. Әрі бізге бұл тағылымдар тарих беттерінен белгілі.
Ұлы Отан соғысы мен тыл ардагерлерінің денсаулығын түзеу мақсатында облысымызда сауықтыру орталықтары жұмыс жасайды. Сол орындарға қаламыздағы ардагерлерді жыл сайын жіберіп отырамыз. Қаламызда соғыс ардагерлеріне қал-жағдайын жергілікті дәрігерлер тұрақты түрде тексеріп, емдік шараларын жүргізіп отырады. Майдангер ардагерлердің әрқайсысына дәрігер бекітілген. Жеңілдікпен босатылатын дәрі-дәрмектер уақтылы беріліп тұрады, айтулы күндерде жергілікті әкімдік тарапынан қаржылай көмектер жасалып, қамқорлықтар тұрақты түрде көрсетіліп келеді. Соғыста ерлікпен қаза тапқан азаматтардың рухтарына бас иіп, қан майданнан аман-есен ортамызға оралған ардақты ардагерлерімізді қадірлеу әрқашан да перзенттік парызымыз болып табылады.
Қоғамымызда түрлі дін, тіл өкілдерінің өмір сүруіне қарамастан, түсіністіктің, сыйластықтың орнауында Елбасының жүргізген сындарлы-салиқалы саясаты мен бірге аға ұрпақтың да үлесі ерен. Қазақ отбасындағы ата мен әженің орны ерекше әрі қадірлі. Қазақта «Қарты бар үйдің – қазынасы бар» деп текке айтылмаған. Еліміздегі барша қарттарымызды қолдан келгенше қадірлеп, құрмет көрсету әрбір азаматтың борышы деп білемін. Сондықтан қарттарды алдағы келе жатқан 1 қазан – Халықаралық қарттар күні мерекесімен құттықтай отырып, олардың дендеріне саулық, отбасыларына амандық пен береке тілеймін.
Ж.ҚҰЛБАЙЫМБЕТОВ,
қалалық ардагерлер ұйымының төрағасы.