Әкімдік жұмысының негізгі бағыттарының бірі және бірегейі тұрғындарға сапалы мемлекеттік қызмет көрсету. Осы бағытта қала әкімі Рашид Аюпов қызметін бастаған күннен төңірегіндегі әкімдік қызметкерлерінің біліктілігін арттыру арқылы заман талабына сай барлық мүмкіндіктерді қолдануды басшылыққа алды. Нәтижесі де жоқ емес. Бүгінде әкімдіктің дербес бөлімдері әлеуметтік желілерге тіркеліп, бұрынғыдан да халыққа жақындай түсті.
Сол арқылы тұрғындардың уақыт жоғалтып, әкімдік есігін торуылдауы анағұрлым азайып, ғаламтор – халық үніне зер салып, олардың көкейіндегі сауалдарға жылдам әрі нақты жауап беріп қана қоймай, түйіткілді мәселесінің түйінін тарқатуға сеп болды. Нақтылай айтқанда «Ашық әкімдік», «Халықтық әкімдік» жүйесін қолға алып, азаматтардың сауалын тыңдауда да, қызмет барысында түскен өтініштер мен жеке және қоғамдық қабылдауларда да түскен әрбір мәселеге жіті мән беріп, тиімді жолдарын қарастырып, оған лайықты жауап беруді ойластырып, сол бойынша жұмыс атқарылуда.
Сондай-ақ, қаңтар айында «Халықтық кеңсе» іске қосылды. Мұнда әкімдікке қарасты дербес бөлімдерді қоса алғанда мемлекеттік қызметтің 70-ке тарта түрі көрсетілуде. Халықтық кеңсеге келушілер саны орта есеппен күніне 110-120 адам мекеменің игілігін көреді. Бұл жүйе тиімділігін дәлелдеп, жақсы нәтижеге қол жеткізгендіктен, мұндай екінші кеңсені осы жылы ашу көзделіп отыр. Бұған қоса қала қонақтары үшін «Қабылдау орталығы» ашылғанын да айта кету қажет. Аталмыш орын бүгінде техникалық түрде жұмысын жасап, әр келушінің бірінші аяқ басар орталығына айналды. Мұнда туристер үшін барлық жағдайлар жасалған.
Шынар Болат.