МАҚТААРАЛДА ӨТЕМАҚЫ АУДАРЫЛАТЫН БАНК КАРТАЛАРЫ ТАРАТЫЛА БАСТАДЫ

817 көрілім

Мақтаарал ауданында топан судан зардап шеккен 6128 тұрғынға үкімет резерві есебінен 100 мың теңге өтемақы төлеу үшін «Халық банк» карталары таратыла бастады. Осы мақсатта қазіргі таңда Мырзакенттегі «Гүлсара» тойханасы мен «Нұрбөбек» балабақшасында және «А.Пушкин» атындағы жалпы орта мектебінде, сондай-ақ, Атакент кенті мен басқа да эвакуациялық орталықтарда мамандар карта үлестіру жұмыстарын бастап кетті.

Ә.Усмановтың қорынан 5202 отбасыға бөлінетін 1000 АҚШ долларлық өтемақы да осы карталарға аударылатын болады. Бүгін бұл туралы Түркістан облысы қаржы және мемлекеттік активтер басқармасының басшысы Абдрахман Тасыбаев мәлім етті.

Басқарма басшысының айтуынша, үкімет резервінен берілетін 100 мың теңге өтемақы су тасқынынын зардап шеккен 5 елді мекенде, яғни, Жеңіс, Жаңатұрмыс, Фердауси, Достық және Өргебас ауылдарында тұратын 846 отбасындағы 6128 тұрғынға берілетін болады.

Ал, Ә.Усмановтың қорынан қаралған 1000 АҚШ долларын су басқан Жеңіс, Жаңатұрмыс, Фердауси, Достық, Өргебас ауылдарымен қатар эвакуацияланған Мырзакент, Ақжол, Т.Жайлыбаев, Жантақсай, Арайлы, Нұрлытаң, Нұрлыжол және Шұғыла елді мекендеріндегі 5202 отбасына үлестірілмек.

Айта кетейік, Мақтаарал ауданындағы банк картасын тарату орындарында коронавирус індетіне байланысты қабылданған сақтық шараларының барлық талаптары қатаң түрде сақталу көзделген.

Бауыржан НАЙМАНОВ.