ТАРИХИ ТАҢДАУ: ЕЛ ЕРТЕҢІНЕ ЖОЛ АШАТЫН ҚҰРЫЛТАЙ

509 көрілім

Сайлау аяқталды. Бірақ ел алдындағы үлкен жұмыс енді басталады. 23 тамыз – Қазақстанның саяси тарихындағы айрықша күн. Бүгін елімізде алғаш рет жаңа бірпалаталы Парламент – Құрылтай депутаттарын сайлау өтті. Бұл – азаматтардың өз таңдауын жасап қана қоймай, елдің саяси жүйесіндегі жаңа кезеңнің басталуына үн қосқан маңызды қоғамдық-саяси оқиға.
Сайлау учаскелері таңғы сағат 7:00-де жұмысын бастап, азаматтарға конституциялық құқығын жүзеге асыруға мүмкіндік берді. Ел көлемінде дауыс беру барысы ақпарат құралдары арқылы үздіксіз жарияланып, сайлау процесінің ашықтығы мен ұйымдастырылуына назар аударылды.
Бұл сайлаудың басты ерекшелігі – оның Қазақстанның жаңа саяси моделін қалыптастырумен тікелей байланысты болуында. Құрылтайдың қалыптасуы елдегі өкілді билік институттарының жаңа құрылымын іс жүзінде іске асыруға жол ашады. Сондықтан бүгінгі таңдау жекелеген кандидаттарға дауыс берумен шектелмейді. Оның ар жағында азаматтардың елдің алдағы даму бағытына деген көзқарасы, қоғамдағы өзекті мәселелерді шешуге қатысты ұстанымы тұр.
Сайлауалды кезеңде кандидаттар мен саяси күштер халықпен кездесіп, әлеуметтік-экономикалық даму, өңірлердің әлеуетін арттыру, ауыл мен қала арасындағы мүмкіндіктерді теңестіру, білім, денсаулық сақтау, кәсіпкерлік және әлеуметтік қорғау мәселелерін көтерді. Ендігі міндет – сайлауалды кезеңде айтылған ұсыныстардың нақты жұмысқа айналуы.
Демек, бүгінгі дауыс – ертеңгі жауапкершіліктің бастауы.
Құрылтай сайлауында Түркістан облысының тұрғындары да белсенділік танытты. Өңір бойынша 1 204 659 сайлаушы тіркеліп, дауыс беруді ұйымдастыру үшін 952 сайлау учаскесі жұмыс істеді.
Сайлау қорытындысы бойынша Түркістан облысындағы қатысу көрсеткіші 92 пайыздан асқаны хабарланды.
Бұл сандар – Түркістан жұртының қоғамдық-саяси өмірге бейжай қарамайтынын көрсететін маңызды көрсеткіш. Әсіресе тарихи шаһардың тұрғындары үшін Құрылтай сайлауының мәні ерекше. Өйткені Түркістан – тек өңірлік емес, ұлттық деңгейдегі тарихи-мәдени орталық. Мұнда халықтың ел болашағына қатысты кез келген саяси бастамаға көзқарасы қоғамдық маңызға ие.
Кез келген сайлаудың мәнін оның нәтижесі ғана емес, одан кейінгі жұмыс айқындайды. Құрылтай депутаттарына артылатын жауапкершілік те осында.
Халықтың таңдауы – сенім. Ал сенімге жауап беру үшін депутаттар ел ішіндегі мәселелерді жақсы білуі, халықпен тұрақты байланыс орнатуы және көтерілген мәселелердің шешілуіне нақты ықпал етуі қажет.
Әсіресе өңірлердің үні жаңа Құрылтайда анық естілуі маңызды. Себебі елдің дамуы тек ірі қалалардың жетістігімен өлшенбейді. Ауылдың ахуалы, ауданның тынысы, шағын қалалардың мәселесі – тұтас мемлекеттің әлеуметтік-экономикалық жағдайының көрсеткіші.
Бүгінгі саяси науқан тағы бір маңызды мәселені көрсетті. Демократиялық қоғамда сайлау тек дауыс беру күнімен шектелмейді. Азаматтың саяси сауаты, ақпаратты саралай білуі, кандидаттардың бағдарламасына назар аударуы және өз таңдауын саналы түрде жасауы – саяси мәдениеттің маңызды бөлігі.
Осы тұрғыдан алғанда, Құрылтай сайлауы қоғамның жаңа саяси кезеңге бейімделуінің бір көрінісі болды. Халықтың кандидаттарды салыстырып, бағдарламаларына назар аударып, елдің болашағына қатысты өз ұстанымын білдіруі – азаматтық жауапкершіліктің белгісі.
Қорыта айтқанда, ендігі сөз – істе.
Бүгінгі сайлау тарих бетінде қалатын күндердің бірі болмақ. Себебі азаматтар жаңа саяси институттың қалыптасуына өз дауысымен үлес қосты.
Енді қоғамның назары Құрылтайдың нақты жұмысына ауысады. Сайлауалды кезеңдегі уәделердің орындалуы, халықтың ұсыныстарының ескерілуі, заң шығару жұмысының сапасы – жаңа депутаттардың қызметіне берілетін негізгі баға болмақ.
Түркістан өңірі үшін де бұл кезеңнің маңызы зор. Елдегі халық саны көп, әлеуметтік-экономикалық әлеуеті жоғары аймақтардың бірі ретінде облыстың мәселелері мен мүмкіндіктері жаңа Құрылтай мінберінде лайықты көрініс табуы тиіс.
Бүгін халық таңдау жасады. Енді сол таңдаудың салмағын сезініп, ел сенімін ақтау – жаңа Құрылтай депутаттарының басты міндеті.