Қала әкімінің орынбасары Байдулла Оразбеков қаладағы заңсыз карьерлердің жұмысын тоқтату және құрылыс саласындағы экологиялық мәселелер бойынша арнайы жиын өткізді. Жиынға қалалық полиция басқармасының өкілдері, салық департаментінің қызметкерлері және құрылыс компанияларының басшылары қатысты.
Жиын барысында бірінші кезекте экологиялық мәселелер қозғалды. Қалада бірнеше заңсыз қоқыс карьерлеріне құрылыс қалдықтарын заңсыз тасымалдау мен жоюдың негізгі орындары анықталып, қазіргі таңда бақылау күшейтіліп, ретке келтіру жұмыстары істелуде.
Құрылыс компаниялары мен тұрғындар тарапынан мұндай әрекеттердің көбеюі – қаланың тазалығы мен экологиялық жағдайдың нашарлауына әкеп соқпақ.
Сонымен қатар, жиын барысында құрылыс техникаларының қала көшелерін ластауы, шетелдік азаматтардың заңсыз жұмысқа тартылуы ерекше назарға алынды.
Алдағы уақытта мәселені шешу үшін барлық тиісті органдар мен құрылыс компаниялары арасында тығыз қарым-қатынас орнатылып, заңсыз әрекеттерге қарсы кешенді шаралар қабылданады. Сонымен қатар, заңсыз карьерлер мен құрылыс қалдықтарын қадағалау үшін арнайы мониторингтік топтар құрылып, қала аумағында тұрақты бақылау жүргізілетін болады.
Заңсыз әрекеттерге жол берген құрылыс компаниялары мен жеке тұлғаларға ҚР ӘҚБтК-нің 434 бабының 2-бөлігі бойынша 10АЕК, 505-бабының 2-бөлігі бойынша 2 АЕК айыппұлдар салынып, жерқойнауын заңсыз пайдаланғандар қылмыстық жауапкершілікке тартылатын болады.