Жақында Түркістан қаласында Қазақстан мәслихаттарына 30 жыл толуына орай ұйымдастырылған шахматтан «SENAT OPEN» ашық турнирі өтті.
Түркістан облыстық мәслихатының ұйымдастыруымен, Қазақстан шахмат федерациясының қолдауымен және ҚР Парламенті Сенатының бастамасымен өткізілген турнирге Түркістан облыстық мәслихатының төрағасы Н.Әбішов, Шахмат федерациясының вице-президенті А.Бабенко, облыс әкімі аппаратының басшысы Е.Әлімқұлов, облыстық, қалалық, аудандық мәслихат депутаттары мен Қоғамдық кеңес мүшелерінің барлық шақырылымы, қоғам белсенділері мен БАҚ өкілдері қатысты. Шахмат мәдениетін дамытудағы маңызды қадамға айналған жарысты, облыстық мәслихат төрағасы Н.Әбішов құттықтау сөз сөйлеп, ашып берді.
Жалпы саны 100-ден аса қатысушы жиналған, 17 командадан құралған іс-шараның Рухани астанада өтуіне, Түркістан облыстық мәслихатының құрылғанына 30 жыл толуы бастама болды. Жүзден жүйрік, мыңнан тұлпарлар қатысқан аталмыш ой бәсекесіне Сауран ауданының мәслихат депутаттары С.Оразбеков, Д.Ирисбаев бақ сынады.
Интеллектуалды ойынның қорытынды салтанатына облыстық мәслихат төрағасы Н.Әбішов қатысып, жеңімпаздарды марапаттады. Негізгі марапат бойынша 1-орынды Сайрамнан келген А.Абдикаримов, 2-орын түлкібастық М.Шулашов және және 3-орынды шардаралық С.Нағызбеков жеңіп алды. Сонымен қатар командалық ойында Бәйдібек ауданы көш бастаса, 2-орынды Түлкібас ауданы иеленді. Ал жүлделі 3-орынға Шардара ауданы жайғасты.
Ынталандыру марапаттары бойынша халық қалаулылары, БАҚ өкілдері, қоғам қайраткерлері және әйелдер арасында үздік көрсеткіш иелері мен 60 жастан асқан ойыншылар арасында үздік деп танылған қатысушылар арнайы облыстық мәслихаттың алғыс хатымен марапатталды. Барлық шахмат ойынына қатысқан жеңімпаздарға арнайы диплом, медаль табыс етілді. Сондай-ақ қатысушыларға сертификаттар табысталды.
Жарыс жеңімпаздары алдағы уақытта Шымкент қаласында өтетін жартылай финалда бақтарын сынайды.
Айта кетейік, спорттық шара Қазақстан шахмат федерациясының ұйымдастыруымен, ҚР Парламенті Сенатының қолдауымен биылғы сәуір-тамыз айлары аралығында еліміздің барлық өңірлерінде жалғасатын болады. Өткенге сәл шегініс жасасақ, киелі кесене маңында республикалық «Шахмат керуені» турнирінің өткенін де еске сала кетейік.