Елімізде бүгін «Спорт күні» мерекесі жан-жақты тойлануда. Осы орайда Түркістан облысының сала қызметкерлері арасындағы спорттың 4 түрінен кіші футбол, волейбол, үстел теннисі, арқан тартудан спартакиада өтті. Апта бойына жалғасқан спорттық дода тартысқа толы өтті. Төлеби ауданындағы «Бәйшешек» сауықтыру спорт базасында ақтық бәсекелер өтіп, жеңімпаздар анықталды. Спорт мерекесіне арнайы қатысқан Түркістан облысының әкімінің аппарат басшысы Еркеғали Әлімқұлов сала мамандарын құттықтап, жеңімпаздарды марапаттады. Бейнероликті назарларыңызға ұсынамыз.
Бұл ретте облыс әкімінің аппарат басшысы Еркеғали Амантайұлы алдағы кезде өтетін Азия ойындары мен Париж олимпиадасында жерлестерімізге сәттілік тіледі. Бейбітшілік пен бірлікті ту еткен сала қызметкерлеріне табыс тілеп, Қазақстан спортының дамуына өз үлестерін қоса беретін жерлестерімізді жарқын жетістіктерімен құттықтады. Сөз барысында облыс әкімі Дархан Сатыбалды әрдайым спортшыларымызға қолдау көрсете беретінін де тілге тиек етті.
Аса тартысты өткен кіші футбол бәсекесінде Түлкібас ауданының командасы 1-орын алса, күміс жүлде Жетісай ауданының құрамасында. Ал, қола жүлдені Қазығұрт ауданынан келген команда қанағат етті. Бұдан өзге жерлестеріміз волейбол спортынан да бақтарын сынады. Шаршы алаңда мықтылықтарын көрсеткен түлкібастықтар бұл сында да жеңімпаз атанса, Мақтаарал ауданының құрамасы күміс жүлдеге қол жеткізді. Түркістан қаласының командасы қола жүлдеге қанағат етті. Сондай-ақ, арқан тарту спортынан топ жарған Шардара ауданының командасы алтын медаль иеленсе, күміс жүлдегер облыстық спорт басқармасының қызметкерлері атанды. Бұдан басқа қола жүлдені Төлеби ауданының командасы жеңіп алды. Үстел теннисі жарысында да жеңімпаздар мен жүлдегерлер бар күш-жігерлерін ортаға салды. Сонымен, қыздар арасында бас жүлдені жетісайлық Аружан Нұржанқызы иеленсе, Отырар ауданынан келген талантты спортшы қыз Айда Жаңабай күміспен күптелді. Ал, сайрамдық Азия Әлібек қола жүлдегер атанды. Ұлдар арасында сынға түскен Сайрам ауданының өкілі Ариф Эгамбердиев талантының арқасында алтын жүлде жеңіп алса, сарыағаштық Арман Абдалиев күміс жүлдеге ие болды. Қола жүлде Отырар ауданының намысын қорғаған Тойшыбек Темірәліге бұйырды.
Достастық пен бірлікті насихаттаған сайыста жалпыкомандалық жеңімпаздарда белгілі болды. Бұл сында бас жүлдені Түлкібас ауданы 1-орын алса, 2-орын Жетісай ауданының құрамасы жеңіп алды. Сонымен қатар, Отырар ауданының саңлақтары 3-орынға қанағат етті. Айта өтерлігі, «Бәйшешек» спорт базасында ақтық ойындар өтіп, жеңімпаздарды есімі белгілі болды. Шара соңында жеңімпаздар мен жүлдегерлерге арнайы тағайындалған медальдан мен кубоктар табыс етілді. Сонымен қатар, әр спорт түріндегі үздітер де марапаттан шет қалмады.
Түркістан облысының дене шынықтыру және спорт басқармасының басшысы Қанат Жолдықараев дәстүрлі жарыстың биыл ерекше болып ұйымдастырылғанын айтып, бұл ғаламат жеңісті саңлақтарымыз Түркістан облысының құрылғанына бес жыл толуына арнайтындықтарын жеткізді. Осылайша, тамаша жеңістің үлгісін көрсеткен облысымыздың саңлақтары жеңіске жетіп, жақсы көңіл- күймен тарқасты.