Мемлекеттік тілдің қолданыс аясын кеңейту, жастардың қазақ тіліне деген сүйіспеншілігін арттыру, мемлекеттік тілді құрметтеуге баулу мақсатында Жетісай аудандық орталықтандырылған кітапханалар жүйесінің оқу залында аудандық «Тілдерді оқыту және дамыту орталығы» КММ-нің ұйымдастыруымен «Тіл – татулық тірегі» тақырыбында әдеби кеш өтті. Әдеби кешке Жетісай аудандық «Тілдерді оқыту және дамыту орталығы» КММ басшысы Қ.Рысмаханов, аудандық Ақсақалдар кеңесінің төраға орынбасары Д.Жақыпбаев, облыстық тәжік этномәдени бірлестігінің төрағасы Ю.Султанов, аудандық тәжік этномәдени бірлестігінің төрағасы Х.Турсунов, «Шаңырақ» отбасы клубының мүшесі Б.Қанаева, «Қоғамдық келісім» КММ Жетісай аудандық филиалы, орталықтандырылған кітапхана мен «Жастар ресурстық орталығының» қызметкерлері және этнос өкілдері қатысты.
Әдеби кеш барысында жиынға қатысушылар қазіргі таңдағы біздің міндетіміз – мемлекеттік тілдің қоғамдағы беделін нығайтып, мемлекеттік тіліміздің мәртебесін көтеру бәріміздің азаматтық борышымыз екеніне тоқталды. Сондай-ақ, іс-шарада аудандық кітапхана қызметкерлерінің тақырыпқа сай дайындаған баяндамалары оқылып, кітап көрмесі таныстырылды. Әдеби кеш соңында қатысушыларға ұйымдастырушылар тарапынан естелікке күнделік дәптер мен қаламсаптар табысталды.
Мемлекеттік тілдің дамуы жолында қазақ халқының әр перзентінің атқаратын қызметі мен қосатын үлесі зор. Өйткені, тіл мәселесі өте маңызды мәселе, біріншіден, тіл – өзімізді ұлт ретінде сақтаудың қорғаны, екіншіден, барлық қазақстандықтарды біріктіруші ортақ байлығымыз. Олай болса, мемлекеттік тілді білу – әр жанұяның, әр ұжымның негізгі мақсаты, біз тіл арқылы ғана ата-бабамыздан келе жатқан ұлттық құндылықтарымызды ұрпаққа аманаттай аламыз.