Түркістан облысында «Құқықтық көмек» жобасы қарқынды жұмыс жасауда. Қоғамдық қабылдауға жүгінушілер, көмекке мұқтаж жандардың саны күн сайын артып келеді. Бұл «AMANAT» партиясының аталған құқықтық жобасының маңызды әрі халыққа пайдалы екендігінің дәлелі. Соның бірі Түркістан облысы, Сайрам ауданына қарасты Қарамұрт ауылының тұрғыны Нухринса Иристаева «AMANAT» партиясы Сайрам аудандық филиалының көмегіне жүгініп, өзін алдаған алаяқтардың қулығын іске асыруына тосқауыл қойған.
«Алаяқтар менің атымнан несие рәсімдеп, банк алдындағы берешегім 2,5 миллион теңгеге жетті. Өзім ІІІ-топтағы мүгедек, жалғызбасты анамын. 2 балам бар. Алғашында «AMANAT» партиясында «Құқықтық көмек» жобасы аясында қоғамдық қабылдау өтеді дегенді естіп келдім. Мұнда заңгерлердің көмегіне жүгініп, мәселемді айттым. Бүгінде сол түйіннің күрмеуі ағытылып, менің атымнан алынған несиені алаяқтар өзі төлеп жүр», – деді Нухринса Иристаева.
Сонымен қатар, ауыл тұрғыны «AMANAT» партиясы Сайрам аудандық филиалы Қарамұрт ауыл округінің әкімшілігіне ақылы қоғамдық жұмысқа орналастырғанын айтып қуанышын жасырмады.
«Партияға үлкен алғыс айтамын. Басымнан өткен жағдайды айтып жеткізе алмаймын. Қатты уайымдадым. Бүгінде алаяқтың арбауына түсіп жатқандар аз емес. Барлығына партияның «құқықтық көмек» жобасына келіп кеңес алуға, заңды үйренуге шақырамын», – деді ауыл тұрғыны.
НУХРИНСА ИРИСТАЕВА: «AMANAT» МЕНІ АЛАЯҚТАРДАН ҚҰТҚАРДЫ»
606 көрілім