Түркістанның әр өңірінде «Парасат» атты пікірталас клубы ашылып, клубтардың алғашқы пікірталас, ойтолғам отырыстары өтіп жатыр. Мақтаарал ауданында да “Парасат” клубы ашылды. Жаңадан ашылған пікірталас алаңында жергілікті халықтың ұсыныстарына қарай өңір басшылары мен тұрғындар тұрақты түрде ашық диалог жүргізіп, ең өзекті мәселелерді талқылап, түсіндіру мен шешу жолдарын қарастырды.
Аудан әкімінің өзі басшылық жасаған жиынға ауданның ардагерлері, әкімдер мен бөлім басшылары, қоғамдық ұйымдардың басшылары, орта буын өкілдері мен жастар, журналистер және белсенді блогерлер қатысты.
— Аталған жоба Мемлекет басшысы Қасым-Жомарт Тоқаевтың «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауы мен «Халық үніне құлақ асатын мемлекет» тұжырымдамасымен ұштасады. «Парасат” алаңында ауданымыздағы өзекті мәселелерді ашық талқылап, халық арасында кеңінен түсіндіру жұмыстарын жүргізіп, шешу жолдарын қарастыратын боламыз», – деді аудан әкімі Бақыт Асанов.
Жиында “Nur Otan” партиясының Мақтаарал аудандық филиалының бірінші орынбасары Досым Асабаев клубтың мақсаты мен міндеті, оның құрамы, басшылық жасау тәртібі, жалпы клубтың ұйымдастыру жұмыстары жөнінде кеңінен баяндады. Сондай-ақ клубтың кезекті отырысына бірнеше мәселелі тақырыптар ұсынылды. Осылайша жиынға қатысушылар тарапынан айтылған ұсыныс-пікірлер мен сын-ескертпелер тыңдалды. Басқосудың нәтижесінде клубтың хатшысы бекітіліп, құрамы нақтыланды. Сонымен қатар алдағы 1-наурыз күні өтетін жиынға аудандағы әлеуметтік саладағы мәселелерді талқылау келісіліп, кемшіліктерді анықтау үшін арнайы мамандар мен қоғам белсенділерінен, блогерлерден тұратын жұмысшы топ бекітілді.