ТҮРКІСТАНДА СУДЫ БУ ТҮРІНДЕ ШАШАТЫН СУБҰРҚАҚ ІСКЕ ҚОСЫЛАДЫ

1  046 көрілім

Темір жол вокзалы алдындағы аллея бүгінде аяқталуға жақын, деп хабарлайды «Yassy-tur.kz»  ақпарат агенттігі  Түркістан қаласы әкімдігінің turakimat.gov.kz сайтына сілтеме жасап.

Түркістан қаласының әкімі Рашид Аюпов орталық базар бойындағы жер асты өткелі алдынан салынып жатқан аллеяның жұмыс барысын бақылады. Мұндағы Тәуке хан даңғылы мен С.Ерубаев көшесі аралығында жартылай арка орнатылып, жарты бөлігіне жасыл желек, аяқжол (тротуар), жарықшам, орындықтар мен қоршаулар болады. Ал, екі шетінде орналасқан шағын кәсіпкерлік нысандар келбеті бірыңғай үлгіге келтіріледі.

Сәтін салса, 30 наурызда құрылысы басталған демалыс орны – 9 мамыр – Жеңіс күні мерекесіне орай толықтай аяқталады деп жоспарланған.

Ал, Темір жол вокзалы алдындағы аллея бүгінде аяқталуға шақ қалған. Бірегей жоба қалаға келуші қонақтар үшін өзгеше демалыс орны болмақ. Олай дейтін себебіміз, мұнда ерекше субұрқақ іске қосылады. Орнатылған төрт арканың жоғарғы жағынан суды бу түрінде шашатын қондырғы қойылған. Келушілер аркадан өткенде қоңырсалқын леп сыйлап, күннің ыстығынан қорғайды.

Сондай-ақ, жан-жағы түрлі түске еніп, жарықшамдар жағылады. Дегенмен, атқарылған істердің кем-кетіктері де жоқ емес. Қала басшысы қатаң ескерткен бетондардың біркелкі төселмеуін мердігерлер өз есебінен қалыпқа келтіреді.

• 

Қазірде аяқжол тастары жасалып, абаттандыру жұмыстары жүргізіліп жатқан аумақ 1 мамырға дейін аяқталады деп жоспарланған.

Сонымен қатар, “Бекзат” мөлтек ауданындағы екі қабатты үйлер мен Төле би көшесі қиылысында тұратын отбасындағы балалар үшін салынған ойын алаңшалары да аяқталып, қалада төтенше жағдай аяқталғанда арқа-жарқа күй кешіп, ойын балалары үшін шаттық сыйлар алаңға айналмақ.