ҮКІМЕТТЕ ИНВЕСТИЦИЯЛЫҚ АХУАЛДЫ ЖАҚСАРТУ ТУРАЛЫ ҰСЫНЫСТАР ҚАРАЛДЫ

146 көрілім

Ұлттық экономика министрі Әлібек Қуантыров 2022 жылдың қорытындысы бойынша негізгі капиталға салынған инвестициялар көлемі шамамен 15 трлн теңге болғанын мәлімдеді. Бұл – жоспардың 94%-ы. Министрдің айтуынша, қазіргі уақытта инвесторлар сыртқы экономикалық жағдайды бақылап, аңдап отырғанына қарамастан, инвестициялық белсенділік қалпына келуде. Бұл ретте республиканың шикізаттық емес секторына салынған тікелей шетелдік инвестициялар көлемі өсіп келеді.

Инвестициялық ахуалды одан әрі жақсарту мақсатында бірқатар кешенді шараны іске асыру қаралып отыр. Атап айтқанда, мемлекеттік преференциялар алу үшін органдардың өтінімдерін келісу мерзімін қысқарту және мемлекеттік қолдау шараларына ие болу үшін инвестициялардың шекті көлемін азайту ұсынылды.

Премьер-министр бұл тәсілдерді қолдап, артықшылықтар берілетін қызметтердің басым бағыттарының тізбесін мұқият пысықтап, жаңа ережелерді бекіту кезінде барлық өңірлік ерекшеліктерді ескеру қажеттігін атап өтті.

Сондай-ақ, отырыста Инвестициялар туралы келісім бекіту тетігін жетілдіру, өңірлердің инвестициялық рейтингін енгізу және қолданыстағы заңдар мен кодекстерде көзделген мемлекеттік қолдау шараларын іске асыруды жандандыруға мүмкіндік беретін инвесторлар үшін арнайы НҚА әзірлеу мәселелері талқыланды.

Отырыс қорытындысы бойынша Премьер-министр республиканың инвестициялық ахуалын жақсарту жөнінде қосымша ұсыныстар әзірлеуді тапсырды. Бұл ретте Үкімет басшысы заңның үстемдігін қамтамасыз ету, яғни құқық қорғау және бақылаушы органдар тарапынан бизнеске қысымды төмендету жөніндегі шараларға баса назар аудару қажеттігін атап өтті.

Добавить комментарий

Ваш адрес email не будет опубликован. Обязательные поля помечены *

Жоғары